Xalq artistinin dəfni ilə bağlı - Nazirlikdən açıqlama/ Yeni

Xəbər verdiyimiz kimi, Xalq artisti Rafiq Əliyev vəfat edib.

Mədəniyyət Nazirliyindən Teleqraf.com-a daxil olan məlumata görə, mərhumun cənazəsi bu gün saat 14:00-da Montin qəsəbəsində yerləşən evindən götürüləcək.

O, Maştağa qəsəbəsindəki qəbirstanlıqda anasının yanında dəfn ediləcək.

***

Azərbaycanın xalq artisti, aktyor Rafiq Əliyev vəfat edib.

Teleqraf.com xəbər verir ki, Rafiq Əliyev 71 yaşında dünyasını dəyişib.

Rafiq Hacıbaba oğlu Əliyev 14 noyabr 1949-cu ildə Füzuli rayonunun Merdinli kəndində anadan olub. 1970-ci ildə Azərbaycan Dövlət İncəsənət İnstitutunun musiqili komediya aktyorluğu fakültəsinə qəbul olunub. 1976-cı ildə Azərbaycan Dövlət Gənc Tamaşaçılar Teatrına işə dəvət olunub.

Teatrda çalışdığı 30 ildən artıq dövrdə maraqlı obrazlar qalerayası yaradıb. 2004-cü ilin mayında Azərbaycan Teatr Xadimləri İttifaqının Konfransında İttifaqın yaradıcılıq məsələləri üzrə sədr müavini vəzifəsinə seçilib.

Azərbaycan teatr sənəti qarşısında göstərdiyi xidmətlərə görə 1990-cı ildə əməkdar artist, 2007-ci ildə xalq artisti fəxri adlarına layiq görülüb.