18 Sentyabr 16:22

Dahi bəstəkar Üzeyir Hacıbəyovun vaxtilə iş otağının yerləşdiyi Beynəlxalq Münasibətlərin Təhlili Mərkəzinin (BMTM) inzibati binasında bəstəkarın doğum günü və Milli Musiqi Günü ilə əlaqədar açıq qapı günü keçirilir.

Teleqraf.com xəbər verir ki, məqsəd Azərbaycan musiqisinin məbədi olan Şuşa şəhərinin işğalına, Ermənistanın Azərbaycan torpaqlarına qarşı təcavüzünün davam etməsinə diqqət çəkməklə yanaşı belə bir otağın varlığı barədə Azərbaycan ictimaiyyətini məlumatlandırmaqdır.

Əvvəlcə xüsusi karantin rejiminin tələblərinə uyğun şəkildə açılış mərasimi təşkil olunub. BMTM-in İdarə Heyətinin sədri Fərid Şəfiyev BMTM-in hazırda fəaliyyət göstərdiyi binada ilk olaraq Bakı Musiqi Akademiyasının fəaliyyət göstərdiyini deyib və bir çox Bakı sakinlərinin Üzeyir Hacıbəyovun bu otaqda fəaliyyət göstərdiyindən xəbərsiz olduğunu bildirib:

“Bakının bir çox sirləri var. Arxitekturası gözəldir, mərkəz küçələri tarixi binalarla zəngindir. Lakin bir çoxları - tarixçilər, araşdırmaçılar bu otağın varlığından xəbərsizdir. Biz düşündük ki, bunu müəyyən mənada təbliğ etməliyik. Təşkil etdiyimiz tədbir həm də siyasi xarakter daşıyır. Azərbaycanın bir çox mədəniyyət xadimləri, o cümlədən dahi bəstəkar Üzeyir Hacıbəyov Şuşada anadan olub. Təəssüf ki, bu şəhər Azərbaycanın bır sıra digər rayonları ilə birlikdə işğal altındadır.

Bizim mərkəz beynəlxalq məsələlərlə məşğuldur və ən əsas işimiz Ermənistan-Azərbaycan Dağlıq Qarabağ münaqişəsi ilə bağlıdır. Biz bu əlamətdar gündən istifadə edərək və bu otağı simvolik seçərək həm ölkə, həm də dünya ictimaiyyətinin diqqətini Azərbaycanın işğal olunmuş torpaqlarına çəkmək və işğal faktı ilə heç zaman barışmayacağımızı bəyan etmək istəyirik. Azərbaycanda həm hərbi, həm siyasi istiqamətdə münaqişənin həlli ilə bağlı müəyyən işlər görülür. Bizim də elmi istiqamətdə fəaliyyətimiz işğal olunmuş ərazilərimizin boşaldılması və əhalinin öz yurd-yuvalarına qayıtması ilə bağlıdır”.

Daha sonra çıxış edən Dağlıq Qarabağın Azərbaycanlı İcması İctimai Birliyinin sədri, millət vəkili Tural Gəncəliyev BMTM-ə belə bir tədbirin təşkilinə görə təşəkkür edib və bildirib ki, Üzeyir Hacıbəyov öz əsərləri ilə Azərbaycanı dünya çapında tanıdan şəxsiyyətdir:

“O, qarabağlı və şuşalı olaraq daim Azərbaycanın ürəyində yaşayır. Onun yaradıcılığı Azərbaycanın nə dərəcədə istedadlı insanlar yetişdirdiyini dünyaya sübut edir”.

Tural Gəncəliyev Şuşa ilə ailə bağlarının olduğunu deyərək Üzeyir Hacıbəyovun onun həyatında da dərin izlər buraxdığını diqqətə çatdırıb.

Mərasimə, həmçinin, Mədəniyyət Nazirliyinin nümayəndəsi qatılıb.

Bu gün saat 12:00-dan 17:00-a kimi isə şəhər sakinlər iş otağına baxış imkanına malik olacaqlar. Otağa baxış xüsusi karantin rejiminin tələblərinə uyğun şəkildə həyata keçiriləcək.

Qeyd edək ki, BMTM bir zamanlar Bakı Musiqi Akademiyasının, Asəf Zeynallı adına Musiqi Kollecinin yerləşdiyi binada fəaliyyət göstərir. Tarixi bina 1885-ci ildə tikilib. Bir müddət Üzeyir Hacıbəyovun bu binada iş otağı yerləşib. Uzun müddət boş olan iş otağı təxminən 10 il əvvəl Üzeyir Hacıbəyovun ev muzeyindəki iş otağına bənzər şəkildə tərtib olunub.


Müəllif: Səxavət