"Avropa oyunlarına sən də qoşul"

Bakı Dövlət Universitetinin tələbələri kampaniya keçirir

Bakı Dövlət Universiteti Tələbə həmkarlar İttifaqı Komitəsi Beynəlxalq münasibətlər və iqtisadiyyat fakültəsinin 1-ci kurs tələbələri ilə görüs keçirib.

Oktyabrın 21-ində keçirilən görüşdə BDU Tələbə həmkarlar ittifaqı komitəsinin ( THİK) sədr müavini İlkin Şərifov, idman kafedrasının müdiri Akif Atakişiyev və digər əməkdaşları, Tələbə Gənclər Təşkilatının (TGT) sədr əvəzləyicisi Nicat Kərimov və müvafiq fakültənin THT sədri H.Şahsultan iştirak edib. Görüş iştirakçılarını salamlayaraq tədbiri açıq elan edən İlkin Şərifov tələbələri komitə sədri Daşqın Qənbərovun adından da salamlayıb. İdman kafedrasının müdiri Akif Atakişiyev yeni tələbələri təbrik edərək təhsillərində uğurlar arzu edib. O, gəncləri idman bölmələri, müxtəlif dərnək və klublara yazılmağa çağırıb.

Daha sonra Tələbə Gənclər Təşkilatının sədr əvəzi Nicat Kərimov çıxış edərək təşkilatın fəaliyyəti barədə məlumat verib. Tədbirin əsas təşkilatçısı olan THİK sədr müavini yeni tələbələrə komitənin fəaliyyəti və məqsədləri haqqında danışıb. Universitetdə fəaliyyət göstərən bir çox klublar barədə məlumat verən sədr müavini yeni tələbələri aktiv olmağa və bu klublara qatılmağa dəvət edib. Beynəlxalq münasibətlər və iqtisadiyyat fakültələrinin tələbələri ilə "Avropa oyunlarına sən də qoşul" layihəsi haqqında tələblərə ətraflı məlumat verilib və onları maraqlandıran suallar cavablandırılıb. Seminara yüksək maraq göstərən tələbələr layihə ilə bağlı bir çox yeni ideyalar səsləndiriblər.

Tədbirin sonunda tələbələri universitet həyatı ilə bağlı maraqlandıran suallar cavablandırılıb.

NİGAR
Fotolar Məhəmməd Novruzlunundur