23 İyun 2015 23:06
437

Qiymətli Kağızlar üzrə Dövlət Komitəsində (QKDK) ilk dəfə daimi dövlət qulluğuna qəbul edilən əməkdaşların andiçmə mərasimi keçirilib.

Komitənin ictimaiyyətlə əlaqələr sektorundan Teleqraf.com-a verilən məlumata görə, tədbiri giriş sözü ilə açan QKDK-nın sədr müavini İlqar Muradov ilk dəfə daimi dövlət qulluğuna qəbul edilən əməkdaşları təbrik edərək dövlət qulluqçusunun dövlətin və cəmiyyətin həyatındakı önəmindən danışıb. O, ölkə rəhbərliyi tərəfindən dövlət qulluğuna qəbulda aparılan islahatların istedadlı gənc kadrların bu sahəyə cəlb olunmasına şərait yaratdığını tədbir iştirakçılarının diqqətinə çatdırıb.

İlqar Muradov dövlәt orqanlarına olan ictimai etimadın artırılması üçün dövlәt qulluğunun qarşısında duran әsas vәzifәlәrin yerinə yetirilməsinin vacibliyini vurğulayıb.

Daha sonra daimi dövlət qulluğuna qəbul edilən əməkdaşlara kuratorluq etmiş komitənin təcrübəli dövlət qulluqçuları çıxış edərək ilk dəfə daimi dövlət qulluğuna qəbul edilən şəxslərin staj və sınaq dövründəki fəaliyyətini qiymətləndirərək onlara öz tövsiyələrini veriblər.

Dövlət himni səsləndikdən sonra ilk dəfə daimi dövlət qulluğuna qəbul edilən əməkdaşları dövlət bayrağı altında ölkə konstitusiyasına əl basaraq Azərbaycan Respublikasına sadiq olacaqlarına, onun Konstitusiyasına dönmədən əməl edəcəklərinə, dövlət sirrini və xidməti sirri qoruyacaqlarına, onların üzərinə qoyulan vəzifələri qərəzsiz, vicdanla və Vətənin mənafeyi naminə həyata keçirəcəklərinə and içiblər.

Tədbirin sonunda and içən hər bir əməkdaşa dövlət qulluqçusunun şəhadətnaməsi təqdim edilərək onlara gələcək fəaliyyətlərində uğurlar arzulanıb.

Naibə QURBANOVA


Müəllif: