Ramiz Fətəliyevin 70 illiyi qeyd olundu

Bu gün Nizami Kino Mərkəzində Azərbaycan kino sənətinin görkəmli nümayəndəsi Ramiz Fətəliyevin 70 illik yubiley gecəsi keçirilib.

Teleqraf.com –un xəbərinə görə, tədbirdə mədəniyyət və turizm naziri Əbülfəs Qarayev, nazirin müavini Ədalət Vəliyev, yazıçılar Natiq Rəsulzadə, Çingiz Abdullayev, Kinematoqrafçılar İttifaqının sədri Şəfiqə Məmmədova, Teatr Xadimləri İttifaqının sədri Azər Paşa Nemət və digər sənət xadimləri iştirak edib.

Mədəniyyət və Turizm Nazirliyinin təşkilatçılığı ilə baş tutan tədbirdə Ramiz Fətəliyev həm də aparıcı qismində çıxış edib.

Mədəniyyət və turizm naziri Əbülfəs Qarayev Ramiz Fətəliyevin Azərbaycan kinosundakı xidmətlərindən danışaraq, bir gündə iki fəxri ada layiq görülən ilk sənətçi olduğunu diqqətə çatdırıb. O qeyd edib ki, dövlətin yubilyara münasibətinin ən gözəl təcəssümü Cənab Prezidentin imzaladığı fərmanlar olub: “Nazir çalışdığım bu illərdə ilk dəfə Cənab Prezident bir şəxsiyyət haqda bir gündə iki fərman imzaladı. Bu da Ramiz Fətəliyev idi”.

Yazıçı Çingiz Abdullayev isə Ramiz Fətəliyevlə möhkəm dostluğundan, onun Sovetlər məkanında tələbatlı ssenarist olmasından danışıb.

Gecə yubilyarın sənət dostlarının ürək sözləri, xatirələri, həmçinin yubilyarla bağlı qısametrajlı filmlərin nümayişi ilə davam edib.

Qeyd edək ki, 1970-ci illərin əvvəlindən başlayaraq Ramiz Fətəliyevin ssenariləri əsasında “Ömrün ilk saatı”, “Sizi dünyalar qədər sevirdim”, “Yaramaz” (“Azərbaycanfilm”), “Altıncı”, “Riskə getmədən” (M.Qorki adına Studiya), “Şahidsiz”, “Təzə evlənənlər üçün çətir” ("Mosfilm"), “Ailə işləri”, “Həyatın xırdalıqları” (A.Dovjenko adına Studiya), “Həyatın mənası” ("Özbəkfilm") və s. 50-dən çox film və serial çəkilib.

Ramiz Fətəliyev eyni zamanda “Hökmdarın taleyi”, “Bir anın həqiqəti”, ”Qraf Krestovski” kimi bədii və televiziya filmlərinin quruluşçu rejissoru olub.

Onun ssenari müəllifi və rejissoru olduğu, milli-mənəvi dəyərlərimizin qorunmasına və təbliğinə xidmət edən ekran əsərləri bu gün də tamaşaçılar tərəfindən sevilir və maraqla izlənilir.

Nərmin