Faiq Əmirlinin apelyasiya şikayəti təmin edilmədi

Bu gün Bakı Apelyasiya Məhkəməsində AXCP sədri Əli Kərimlinin köməkçisi, “Azadlıq” qəzetinin yayım direktoru Faiq Əmirlinin şikayətinə baxılıb.

Teleqraf.com xəbər verir ki, hakim Vüqar Məmmədovun sədrlik etdiyi prosesdə şikayət təmin edilməyib.

Nəsimi Rayon Məhkəməsində Faiq Əmirlinin ev dustaqlığına buraxılması ilə bağlı iddia ərizəsinə baxılıb və ərizə təmin edilməyib. Həmin qərardan Faiq Əmirli apelyasiya şikayəti verib.

Nəsimi Rayon Məhkəməsinin qərarı ilə Faiq Əmirlinin barəsində 3 aylıq həbs-qətimkan tədbiri seçilib.

Faiq Əmirli avqustun 20-də saxlanılıb. O, Cinayət Məcəlləsinin 283.1-ci (milli, irqi, sosial və ya dini düşmənçiliyin salınmasına, milli ləyaqətin alçaldılmasına, habelə milli, irqi, sosial və ya dini mənsubiyyətindən asılı olaraq vətəndaşların hüquqlarının məhdudlaşdırılmasına və ya üstünlüklərinin müəyyən edilməsinə yönələn hərəkətlər, aşkar surətdə və ya kütləvi informasiya vasitələrindən istifadə olunmaqla törədildikdə) və 168.1-ci (dini məzhəbləri yaymaq və dini ayinlərin icrası adı altında fəaliyyət göstərən və bu fəaliyyətlə ictimai asayişi pozan, yaxud vətəndaşların sağlamlığına zərər vuran və ya formasından asılı olmayaraq vətəndaşların hüquqlarını pozan, habelə vətəndaşların qanunla müəyyən edilmiş vəzifələrini yerinə yetirməkdən yayındıran qrup təşkil etmə, ona rəhbərlik etmə və ya belə qrupda iştirak etmə) maddələri ilə ittiham edilir.

Hacı Zeynalov