“Qızıl Məryəm”in qızı apelyasiya şikayəti verdi

Anasını öldürməkdə təqsirləndirilən Günel Hüseynova, onun xalası oğlu Nicat Eyvazov və Ceyhun Əsgərov barələrində çıxarılmış hökmdən apelyasiya şikayəti veriblər.

Teleqraf.com-un məlumatına görə, təqsirləndirilən şəxslərin vəkilləri apelyasiya şikayətlərini Bakı Apelyasiya Məhkəməsinə təqdim ediblər.

Nicat Eyvazovun vəkili Firdovsə Baxışəliyeva müvəkkilinin barəsində bəraət hökmünün çıxarılmasını istəyib. Digər təqsirləndirilən şəxslərin müdafiəçiləri isə təyin olunmuş cəzaların yüngülləşdiriləməsini istəyiblər.

Bakı Ağır Cinayətlər Məhkəməsinin hökmü ilə Günel Hüseynov 18 il, Ceyhun Əsgərov 19 və Nicat Eyvazov 10 il müddətinə azadlıqdan məhrum edilib.

İttihama görə, bu il yanvarın 5-də saat 09.00 radələrində 1965-ci il təvəllüdlü Məryəm Nemətzadənin yaşadığı mənzildə üzərində çoxsaylı kəsilmiş-deşilmiş xəsarətlərlə müşayiət olunan meyiti aşkar edilib.
Əməliyyat-axtarış tədbirləri nəticəsində cinayətin mərhumun qızı, 1988-ci il təvəllüdlü Günel Hüseynova, bacısı oğlu, 1998-ci il təvəllüdlü Nicat Eyvazov və 1997-ci il təvəllüdlü Ceyhun Əsgərov tərəfindən törədilməsində əsaslı şübhələr meydana çıxıb və onlar tutularaq istintaqa cəlb olunublar.

Təqsirləndirilən şəxslər Cinayət Məcəlləsinin 120.2.4, 120.2.11 (quldurluqla əlaqədar xüsusi amansızlıqla qəsdən adam öldürmə) və 181.3.3-cü (quldurluq, zərərçəkmiş şəxsin sağlamlığına ağır zərər vurulmaqla törədildikdə) maddələri ilə ittiham edilirlər.

Qətlə yetirilən qadın "Qızıl Məryəm" ləqəbli iş adamı kimi tanınıb. Onun "Moskva" univermağında, eləcə də paytaxtın ayrı-ayrı ünvanlarında isə bir sıra məşhur qızıl mağazaları olub.

Hacı Zeynalov