Bacısına görə dayısı oğlunu öldürdü - Hökm

Bu gün Bakı Ağır Cinayətlər Məhkəməsində bacısını qaçırdığı üçün dayısı oğlunu öldürməkdə təqsirləndirilən 1995-ci il təvəllüdlü Nurlan Quliyevin cinayət işi üzrə növbəti məhkəmə prosesi başa çatıb.

Teleqraf.com xəbər verir ki, hakim Mirzə Xankişiyevin sədrliyi ilə keçirilən prosesdə təqsirləndirilən şəxs 16 il müddətinə azadlıqdan məhrum edilib.

Nurlan Quliyev Cinayət Məcəlləsinin 120.2.4-cü (xüsusi amansızlıqla adam öldürmə) maddəsi ilə ittiham edilib.

O, bacısını qaçırdığı üçün dayısı oğlu Mahiri bıçaqlayaraq öldürüb. Bacısı isə məhkəmədə dayısı oğlunu sevdiyini və könüllü qaçdığını deyib.

Nurlan Quliyev dayısı oğlunu bacısı ilə toy edəndən 2 ay sonra öldürüb, qətli namusunu təmizləmək istəyi ilə izah edib.