Polis rəisi və sabiq prokuror müavini məhkəmədə ifadə verdi

Bu gün Gəncə Ağır Cinayətlər Məhkəməsində dələduzluq və rüşvət verməkdə təqsirləndirilən keçmiş hakim Həsən Əliyev, Elman Məmmədov və Taleh Süleymanovun barəsində olan cinayət işi üzrə məhkəmə prosesi davam etdirilib.

Teleqraf.com xəbər verir ki, hakim Mübariz Məmmədovun sədrliyi ilə keçirilən prosesdə şahid qismində Nərimanov rayon Polis İdarəsinin 16-cı polis bölməsinin rəisi Hikmət Usubov ifadə verib.

Hikmət Usubov qeyd edib ki, cinayət işi üzrə zərərçəkmiş Ramazan Səlimovun şikayəti əsasında araşdırma aparıblar. O, qeyd edib ki, Ramazan Səlimov Həsən Əliyevdən şikayətçi olub.

Daha sonra prosesdə şahid qismində “Azərsu” ASC-nin əməkdaşı Vəli Həsənov ifadə verib. O, ibtidai istintaqa verdiyi ifadəsini təsdiqləyib. Həmçinin Nərimanov rayon prokurorunun sabiq müavini Cavid Quliyev də şahid qismində ifadə verib.

Digər şahid Tariyel Haqverdiyev ifadə verən zaman təqsirləndirilən Elman Məmmədovun səhhəti pisləşib. Bu səbəbdən məhkəməyə təcili yardım briqadası çağırılıb. Ona tibbi yardım göstərilib.

Xatırladaq ki, Rusiyadan gələn iş adamı Ramazan Səlimov Azərbaycanda “yağlı” işə düzəlmək üçün 2011-ci ildən tanıdığı Elman Məmmədova müraciət edib. Elman Məmmədov isə onu Bakı Ağır Cinayətlər Məhkəməsinin hakimi Həsən Əliyevlə tanış edib. Həsən Əliyev də Ramazan Səlimovdan sonuncunu işə düzəltmək adı ilə 600 min manat pul alıb. Lakin sonradan pulu qaytarmayıb.

Bundan sonra Ramazan Səlimov polisə şikayət edib. Şikayət əsasında cinayət işi başlanılıb və Elman Məmmədov həbs edilib. İstintaq dövründə Həsən Əliyevə qarşı Cinayət Məcəlləsinin 178.3.2-ci (külli miqdarda ziyan vurmaqla dələduzluq törətmə) maddəsi ilə bərabər Cinayət Məcəlləsinin 312-ci (rüşvət vermə) maddəsi ilə də ittiham elan olunub. Lakin barəsində həbs-qətimkan tədbiri seçilməyib.

Onu da qeyd edək ki, prezident İlham Əliyev bu il fevralın 11-də Həsən Əliyevin səlahiyyətlərinə vaxtından əvvəl xitam verilməsi haqqında sərəncam imzalayıb. Buna səbəb kimi Həsən Əliyevin qanunvericiliyin tələblərini dəfələrlə kobudcasına pozması göstərilib.

Hacı Zeynalov