Vətəndaşları aldadan tikinti şirkətinin rəhbəri axtarışa verildi

Bir qrup vətəndaşa qarşı dələduzluq etməkdə təqsirli bilinən “Birlik-Inşaat” Məhdud Məsuliyyətli Cəmiyyətin (MMC) direktoru Elman Tağıyev axtarışa verilib.

Teleqraf.com xəbər verir ki, bu barədə Bakı şəhər Baş Polis İdarəsinin rəsmi internet səhifəsində məlumat yerləşdirilib.

Məlumata görə, 1963-cü ildə anadan olan Tağıyev Elman Həsənqulu oğlu Cinayət Məcəlləsinin 178.3.2-ci (külli miqdarda dələduzluq etmək), 308-ci (vəzifə səlahiyyətlərini aşmaq), 319-ci (Azərbaycan Respublikasının dövlət sərhədini qanunsuz olaraq dəyişmə) və 213.3.2-ci (vergi ödəməkdən yayınma) maddələri ilə axtarışa verilib.

Qeyd edək ki, istintaq araşdırması zamanı cəmiyyətin təsisçisi və direktoru Elman Tağıyev, baş mühasibi Roza Minaçaeva, həmçinin MMC-də qeyri-rəsmi işləmiş Soltan Məhərrəmov, Eyvaz Fərəcov və Çingiz Əzimovun özgənin külli miqdarda əmlakını aldatma yolu ilə ələ keçirmək məqsədilə qabaqcadan əlbir olaraq cəmiyyət tərəfindən paytaxtın Xətai rayonu ərazisində inşa olunan çoxmərtəbəli yaşayış binasında 210 mənzili və 1041 kvadrat metr qeyri-yaşayış sahəsini saxta müqavilələr tərtib etməklə 543 nəfərə təkrar sataraq əldə edilmiş 15 milyon 416 min 964 manat vəsaitin 4 milyon 780 min 593 manatını inşa edilən binanın tikintisinə sərf edib, qalan 10 milyon 636 min 371 manat məbləği isə dələduzluq yolu ilə taladıqları müəyyən edilib.

Bundan başqa, məlum olub ki, “Birlik-Inşaat” MMC vergidən də yayınıb.

Bakı Ağır Cinayətlər Məhkəməsinin hökmü ilə Soltan Məhərrəmov 14 il, Çingiz Əzimov 14 il müddətinə azadlıqdan məhrum edilib. Barələrində həbs-qətimkan tədbiri seçilməyən Elman Tağıyev və Roza Minaçaeva barəsində də 14 il müddətinə azadlıqdan məhrumetmə hökmü çıxarılıb. Məhkəmə zalında olan Roza Minaçaeva həbs edilib, Elman Tağıyev isə məhkəməyə gəlmədiyi üçün həbs olunaraq təcridxanaya göndərilməsi barədə qərar qəbul edilib. Cinayət işi üzrə təqsirləndirilən Eyvaz Fərəcovun vəfat etməsi ilə bağlı olaraq onun barəsində olan cinayət işinə xitam verilib.

Hökmdən narazı qalan təqsirləndirilən şəxslər apelyasiya şikayəti veriblər. Onlar şikayətlərində günahsız olduqlarını əsas gətirərək barələrində bəraət hökmünün çıxarılmasını istəyiblər.

Bu ilin mayın 15-də Bakı Apelyasiya Məhkəməsində, hakim Əmir Bayramovun sədrliyi ilə keçirilən məhkum olunan təqsirləndirilən şəxslərin apelyasiya şikayəti üzrə ilkin baxış iclası keçirilib. Prosesdə müdafiə tərəfi işə məhkəmə istintaqı ilə baxılması barədə vəsatət veriblər. Lakin hakimlər müdafiə tərəfinin vəsatətini təmin etməyiblər. İşə məhkəmə istintaqı ilə aparılmadan baxılması barədə qərar qəbul ediblər.

Qərardan təqsirləndirilən şəxslərin vəkilləri kasasiya şikayəti veriblər. Onlar kasasiya şikayətlərində apelyasiya instansiyasında cinayət işinin məhkəmə istintaqı ilə araşdırılmasını istəyiblər. Bu səbəbdən də apelyasiya instansiyasında işin icraatı dayandırılıb və cinayət işinin materialları baxılması üçün yenidən Ali Məhkəməyə göndərilib.

Qeyd edək ki, bir müddət əvvəldə müdafiə tərəfi eyni məzmunlu şikayətlə Ali Məhkəməyə müraciət etmişdilər. Lakin Ali Məhkəmədə işə baxan hakimlər kasasiya şikayətini təmin etməyiblər.

Hacı Zeynalov