DİN-dən ağır qəzalarla bağlı açıqlama: 9 ölü, 14 yaralı

Daxili İşlər Nazirliyi istirahət günləri baş verən yol nəqliyyat hadisəsi ilə bağlı açıqlama yayıb.

Teleqraf.com xəbər verir ki, istirahət günləri respublikanın avtomobil yollarında 13 yol-nəqliyyat hadisəsi baş verib, nəticədə 9 nəfər ölüb, 14 nəfər yaralanıb.

Bakının Nizami rayonu ərazisində yol nəqliyyat hadisəsi baş verib. Bakı şəhər sakini Nadir Dostimərdi idarə etdiyi “Daewoo” markalı avtomobillə yolu keçən Şamaxı rayon sakini İlham Eyvazovu vurub. Xəstəxanaya yerləşdirilmiş piyada orada ölüb.

Daha bir yol nəqliyyat hadisəsi Binəqədi rayonunda qeydə alınıb. Bakı şəhər sakini Ramil Novruzov idarə etdiyi “Nissan” markalı avtomobillə yolu keçən 40-45 yaşlı kişini vurub. Nəticədə piyada xəstəxanaya yerləşdirilib.

Göygöl rayonunda da ölümə səbəb olan yol qəzası baş verib. Göygöl şəhərində rayon sakini Nizami Cəfərov idarə etdiyi “Niva” markalı avtomobillə yolu keçən şəhər sakini Leyla İsmayılovanı vurub, piyada hadisə yerində ölüb.

Oxşar hadisə Şabran rayonunun Dəvəçi kəndində də qeydə alınıb. Kənd sakini Telman Məlikovun idarə etdiyi “VAZ-21043” və Masallı rayon sakini Səfər Əliyevin idarə etdiyi “Ford Transit” markalı avtomobillər toqquşub. Nəticədə T.Məlikov və qardaşı Abdulxalıq xəstəxanaya yerləşdirilib, T.Məlikov orada ölüb.

Qəbələ şəhərində rayon sakini Vəliyəddin Vəliyevin və həmyerlisi Mayıl Cabbarovun idarə etdikləri “VAZ” markalı avtomobillər toqquşub. Nəticədə xəsarət almış Mayıl Cabbarov ölüb.

Daha bir yol nəqliyyat hadisəsi Qusar rayonu Samur qəsəbəsində qeydə alınıb. Rusiya Federasiyası vətəndaşı Xadik Osmanovun idarə etdiyi “Toyota” markalı avtomobillə rayon sakini Əzim Əzimovun idarə etdiyi “T-25” markalı traktor toqquşub. Baş vermiş yanğın nəticəsində avtomobilin və traktorun yanar konstruksiyaları yanıb, Əzim Əzimov xəstəxanaya yerləşdirilsə də, onun həyatını xilas etmək olmayıb.

Qobustan rayonunun Nərimankənd kəndində də ölümə səbəb olan yol nəqliyyat hadisəsi törədilib. Göyçay rayon sakini Şirəli Qapurovun idarə etdiyi “Mercedes”, Bakı şəhər sakini Orxan Veyisovun idarə etdiyi “Wolksvagen” və Abşeron rayon sakini Elsevər Piriyevin idarə etdiyi “Ford” markalı avtomobillər toqquşublar. Nəticədə Elsevər Piriyev, Şirəli Qapurov və onun 1 sərnişini xəstəxanaya yerləşdirilib.

Cəlilabad rayonunun Gülməmmədli kəndində də yol qəzası baş verib. Rayon sakini Ramiz Şükürovun və Vüqar Həziyevin idarə etdikləri “VAZ” markalı avtomobillər toqquşub.

Nəticədə hər 2 sürücü və Vüqar Həziyevin 4 sərnişini, habelə Ramiz Şükürovun 1 sərnişini xəstəxanaya yerləşdirilib, onlardan Rasim İbişov və Rəvan Həziyev orada ölüblər.

Oxşar hadisə Goranboy rayonunda da qeydə alınıb. Goranboy şəhəri ərazisində rayon sakini Rəşad Həsənovun və Kəlbəcər rayon sakini Nurəli Aslanovun idarə etdikləri “VAZ” markalı avtomobillər toqquşub. Rəşad Həsənovun atası Mahir Həsənov xəstəxanaya yerləşdirilib. Ona tibbi yardım göstərilsə də, həyatını xilas etmək mümkün olmayıb.

Gədəbəy rayonunun Qızıltorpaq kəndində müəyyən edilməmiş avtomobillə yolu keçən kənd sakini Famil Hüseynov vurulub. Nəticədə piyada xəstəxanaya yerləşdirilib və orada ölüb.

Daha bir yol qəzası Lənkəran rayonunun Gərmətük kəndində baş verib. Rayon sakini Nurlan Babazadə idarə etdiyi “VAZ-21074” markalı avtomobillə yolu keçən həmyerlisi Nurəddin Ağayevi vurub. Piyada hadisə yerində ölüb.

Hacı Zeynalov