Azərbaycan Avropa İttifaqı ilə danışıqları sürətləndirir

Avropa İttifaqı (Aİ) ilə Azərbaycan arasında yeni saziş üzrə danışıqların əsas hissəsi və ya hamısı noyabrda Şərq Tərəfdaşlığı konfransına qədər yekunlaşa bilər.

Teleqraf.com xəbər verir ki, bu barədə Aİ-nin Bakı ofisindən bildirilib.

"Hər iki tərəf bu danışıqların ilin sonuna qədər bitməsini istəyir. Düşünürəm ki, çox ambisiyalı istəkdir, amma indiki siyasi iradə və danışıqların düzgün tempi qorunarsa bu mümkündür", Aİ Azərbaycan nümayəndəliyinin Birinci Müşaviri Denis Daniilidis müsahibəsində deyib.

Aprelin 25-də Aİ və Azərbaycan yeni siyasi dialoq və qarşılıqlı faydalı əməkdaşlıq təklif edən bu sazişi müzakirə etməyə başlayıb.

Daniilidis əlavə edib ki, "konstruktiv atmosferdə" keçən görüşdə danışıqların ilk mərhələsi olub və tərəflər giriş və əməkdaşlığın əsas prinsipləri barədə razılığa gəliblər.

"Görüş bir gün olmalı idi, amma ikinci günə də uzadıldı. Hər iki tərəf istəyirdi ki, mövzuların böyük hissəsini müzakirə etsinlər. Lakin bəzi hissələr qalıb, onları may ayının sonunda video konfransda müzakirə edəcəklər", deyən müşavir qalan məsələlər barədə detallı açıqlama verməyib və o hissələri "daha əhəmiyyətsiz" adlandırıb.

"Əsas odur ki, tərəflər çox ambisiyalıdır və mövcud Tərəfdaşlıq və Əməkdaşlıq Sazişindən də o tərəfə keçmək istəyir".

Yeni saziş Azərbaycanla Aİ arasında münasibətlərin hüquqi əsası olan 1996-cı ildə imzalanmış Tərəfdaşlıq və Əməkdaşlıq Sazişini (TƏS) (Sənəd 1999-cu ildə qüvvəyə minib) əvəzləmək niyyəti güdür.

Saziş siyasi dialoq, insan hüquqları, ticarət, investisiya, iqtisadi, qanunverici, mədəni və digər əməkdaşlıq sahələrində genişmiqyaslı əməkdaşlığı nəzərdə tutaraq, Azərbaycan qanunvericiliyinin Aİ qanunvericiliyinə uyğunlaşdırılmasını hədəfləyib.