Saakaşvili barədə düşünməyə vaxtım yoxdur – Poroşenko

Ukrayna Prezidenti Petro Poroşenko ilin əvvəlindən indiyədək 27 nəfərin vətəndaşlıqdan məhrum edilməsi ilə bağlı əmr imzalayıb.

Teleqraf.com xəbər verir ki, bunu dövlət başçısının parlamentdəki nümayəndəsi İrina Lutsenko bildirib.

O qeyd edib ki, 27 nəfərin vətəndaşlıqdan məhrum edilmə səbəbləri Odessa vilayətinin eks-qubernatoru, Gürcüstanın sabiq prezidenti Mixail Saakaşvilinin vətəndaşlıqdan məhrum edilməsi səbəbləri ilə eyniyyət təşkil edir. “Bu şəxslər hamısı vətəndaşlıq alarkən qeyri-düzgün məlumatlar təqdim ediblər. 2017-ci ildə anketlərinə yalan məlumat daxil edənlərin sayı ümumilikdə 28 nəfər olub. Onların hamısı ilə bağlı prezident eyni addımı atıb”, - deyə Lutsenko “Beşinci kanal”ın efirində bildirib.

Onun sözlərinə görə, Poroşenkonun Saakaşvili barədə düşünməyə vaxtı yoxdur: “Yaxşı olardı ki, o (Saakaşvili – red.) hamıdan ədalətli olduğunu və öz günahsızlığını Gürcüstan məhkəməsi qarşısında sübut edəydi. Bu, ona qarşı cinayət işinin olmaması ilə sübut olunardı”.

M.Saakaşvili Ukrayna vətəndaşlığını 2015-ci ildə Gürcüstan vətəndaşlığından məhrum edildikdən sonra alıb. Gürcüstanda eks-prezidentlə bağlı bir neçə cinayət işi açılıb. Tiflis Saakaşvilinin ekstradisiyası ilə bağlı iki dəfə Kiyevə müraciət edib, lakin rədd cavabı alıb.