10 min vətəndaş xaricdən təxliyyə edildi - Hikmət Hacıyev

Prezident Administrasiyasının şöbə müdiri Hikmət Hacıyev bu günə qədər 10 minə yaxın Azərbaycan vətəndaşının xaricdən təxliyyə olunduğunu bildirib.

Teleqraf.com xəbər verir ki, H. Hacıyevə görə, bu kimi təxliyyə proseduru böyük işləri özündə ehtiva edir: "Xüsusi reyslərin təşkil edilməsinə, uçuşlara icazənin alınmasına, gigiyena qaydalarının qorunmasına xüsusi diqqət yetirilir.

Azərbaycan vətəndaşları nəzərə almalıdırlar ki, Azərbaycan hökumətindən asılı olmayan məsələlər də var.

İlk növbədə, uşaqlar, xüsusi risk qrupuna daxil olan şəxslər evakuasiya olunacaq. Bu gün ölkədaxili karantində olanların sayı da genişlənir. Hazırda ölkə daxilində yayılma tendensiyası da var. Azərbaycan Respublikasının bütün diplomatik nümayəndəliklərinə müvafiq tapşırıqlar verilib. Xaricdə olan nümayəndəliklər vətəndaşların qeydiyyatını aparır. Amma vətəndaşlarımız nəzərə almalıdırlar ki, olduqları ölkənin karantin rejimlərinə əməl etməlidirlər və təcrid şəraitdə qalmağa diqqət etməlidirlər. Dövlətimiz vətəndaşlarımızın yanındadır”.