AB Türkiyəni təhdid etdi: “Sentyabrın 25-nə qədər vaxtınız var”

Avropa Komissiyası sədrinin müavini Marqaritis Çinas Yunanıstan televiziya kanalına Şərqi Aralıq dənizində yaşanan gərginlik haqqında danışarkən Türkiyəni təhdid edib.

Teleqraf.com xəbər verir ki, Avropa Birliyi (AB) liderlərinin 24-25 sentyabr görüşünün öncəsi Türkiyəyə sonuncu dəfə şans verdiklərini bildirən Avropa Birliyinin rəsmisinin fikrincə, kimsə AB-ni təhdid edən şantaj həyata keçirə bilməyəcək.

Avropa Komissiyasının rəsmisi bildirib ki, sentyabrın 25-nə qədər Şərqi Aralıq dənizindəki gərgin vəziyyətlə bağlı çıxış tapılmasa Ankaraya sanksiyalar tətbiq ediləcək.

Marqaritis Çinas əlavə edib ki, öncədən açıqlanmayan sanksiyalar ən çox zərər verən sanksiyalardır.

Qeyd edək ki, AB-nin Ankaraya sanksiya tətbiq etməsi üçün 27 üzv dövlətin buna razılıq verməsi lazımdır. Əgər Türkiyəyə qarşı sanksiyalar tətbiq ediləcəksə, bu sentyabrın 24-25-də AB-nin toplantısının qərarı əsasında həyata keçiriləcək.

Mütəxəssislər indidən AB-nin Türkiyəyə tətbiq edə biləcəyi sanksiyaların nədən ibarət ola biləcəyini müəyyən etməyə çalışırlar.

Hələ bir müddət əvvəl AB-nin rəsmisi Borrell elan etmişdi ki, Türkiyəyə qarşı sanksiyanın tətbiqi üçün mətn hazırlanıb və üzv dövlətlər arasında bununla əlaqədar razılaşma əldə olunub.

Ehtimal edilir ki, AB-nin Türkiyəyə qarşı sanksiya siyahısında fərdlərin əmlakının dondurulması, Avropa limanlarının, texnologiyasının istifadəsinə qadağa, habelə maliyyə və türk iqtisadiyyatının Avropa iqtisadiyyatına bağlı hisəsinin fəaliyyətlərinin gündəmə gətirilməsi ola bilər.