Lukaşenko ilə bağlı şok iddia: “Təyyarə ilə təcili geri qayıtdı”

Belarus Prezidenti Aleksandr Lukaşenkonun mətbuat katibi Natalya Eysmont dövlət başçısının səhhəti ilə bağlı məlumatlara münasibət bildirib.

Teleqraf.com xəbər verir ki, Eysmont respublika başçısının səhhətində problemin olmadığını deyib.

Onun sözlərinə görə, Lukaşenko sağlamdır: “Dünən o, Rusiya və Ukraynadan gələn qonaqlar və tamaşaçı auditoriyası ilə birlikdə Slavyanski bazarının açılışını izlədi, sonra Minskə yola düşdü. İşgüzar səfər bitdi”. Mətbuat katibi Lukaşenkonun səhhəti ilə bağlı yayılan məlumatları “saxta” adlandırıb.

Qeyd edək ki, bundan əvvəl belaruslu fəal Anton Motolko Teleqram kanalında prezidentin Vitebskdəki Slavyanski bazarında xəstələndiyini, bundan sonra tələsik təyyarə ilə Minskə uçduğunu söyləyib. Fəalın iddiası ölkədə müzakirə mövzusuna çevrilib.