25 Yanvar 21:58
560

Genişmiqyaslı hərbi təlimlər çərçivəsində Cənubi Çin dənizində olan ABŞ Hərbi Dəniz Qüvvələrinə məxsus “USS Carl Vinson” təyyarədaşıyan gəmisindən qalxan qırıcıdakı hərbçilər faciədən son anda dönüblər.

Teleqraf.com xəbər verir ki, “F-35” qırıcısı təyyarədaşıyan gəmiyə enmək istəyərkən qəzaya uğrayıb.

ABŞ-ın Sakit Okean Donanması Komandanlığından verilən açıqlamada hadisənin göyərtədə baş verdiyi və özünü təhlükəsiz şəkildə suya atmağı bacaran pilotun sağ-salamat xilas edildiyi bildirilib.

Qəza ilə bağlı ətraflı məlumat verilməsə də, göyərtədə yaralanan 7 dənizçidən üçünün Filippinin Manila şəhərindəki tibb müəssisəsinə göndərildiyi, vəziyyətlərinin stabil olduğu deyilib.

Bildirilib ki, gəmidə dörd dənizçi müalicə edilib.

Qəzaya uğrayan təyyarənin gəminin göyərtəsində qalıb-qalmadığı və ya dənizə düşüb-düşmədiyi açıqlanmayıb.


Müəllif: Mənsur Rəğbətoğlu