Qırğızıstanın keçmiş prezidenti Almazbek Atambayevin iqamətgahı dövlətin xeyrinə müsadirə edilib.
Teleqraf.com xəbər verir ki, bunu Dövlət Əmlakının İdarə Edilməsi Fondunun (SPMF) nümayəndəsi bildirib: “Almazbek Atambayevə məxsus Çuy vilayətinin Alaməddin rayonunun Koy-Taş kəndində 2,70 hektar torpaq sahəsində ev müsadirə olunaraq dövlət mülkiyyətinə keçirilib”.
Kompleksdə ahıllar üçün stasionar müəssisə yaradılacaq.
2011-2017-ci illərdə Qırğızıstan prezidenti olmuş Atambayev 2019-cu ilin iyununda prezident toxunulmazlığından məhrum edilib və korrupsiya ittihamı ilə üzləşib. Daha sonra ona Bişkekin mərkəzində kütləvi iğtişaşların təşkilində də ittiham irəli sürülüb. 2020-ci il iyunun 23-də Bişkekin Pervomayski Rayon Məhkəməsi Atambayevi 2013-cü ildə kriminal ünsür Əziz Batukaevin qanunsuz azadlığa buraxılması işi üzrə əmlakı müsadirə olunmaqla 11 il 2 ay müddətinə azadlıqdan məhrum edib.