Ukrayna Kupyansk şəhərini azad etdi

Ukrayna hərbçiləri Xarkov vilayətinin Kupyansk şəhərini rus işğalçılarından azad edib.

Teleqraf.com xəbər verir ki, bunu Xarkov vilayət şurasının sədrinin müşaviri Natalya Popova məlumat verib.

“Kupyansk Ukraynadır. Ukrayna Silahlı Qüvvələrinə eşq olsun”,- deyə o yazıb.

Popova həmçinin Kupyansk Şəhər Şurasının binası qarşısında mavi-sarı bayraqlı ukraynalı hərbçilərin fotosunu dərc edib.

Amma hələlik Baş Qərargahdan və ya digər idarələrdən rəsmi təsdiq yoxdur.

Dünən proqnoz edilirdi ki, Ukrayna Silahlı Qüvvələri yaxın 72 saat ərzində Kupyanski rus ordusundan azad edə bilər.

Bu gün Britaniya kəşfiyyatı bildirib ki, Ukrayna bölmələri indi Kupyanskı təhdid edir və onun ələ keçirilməsi Rusiyaya ciddi zərbə olacaq.

Hərbi ekspert Oleq Jdanovun sözlərinə görə, Kupyanskın işğalçılardan azad edilməsi Silahlı Qüvvələr üçün çox vacibdir, çünki bu, Rusiya qoşunlarının İzyum qrupunun maddi-texniki təminatını tamamilə kəsəcək.