İmza an məsələsidir – Türkiyə və Azərbaycandan sonra o ölkə də...

Azərbaycandan sonra Pakistan da Türkiyənin KAAN Milli Döyüş Təyyarəsi Proqramına qatılacaq.

Teleqraf.com xəbər verir ki, bu barədə Türkiyənin “Haber7” saytı məlumat yayıb.

Sayt artıq Pakistanla anlaşmanın imzalanmaq üzrə olduğunu bildirib:

“Bu yaxınlarda yer sınaqlarına başlayan KAAN qırıcı təyyarəsi ilə bağlı Azərbaycan tərəfindən kritik qərar qəbul edilib. Qəbul edilən qərara uyğun olaraq Türkiyə və Azərbaycan milli döyüş təyyarəsinin - KAAN-ın inkişafı üçün əməkdaşlıq müqaviləsi imzalayıb. Məsələ ilə bağlı IDEF-23 beynəlxalq sərgisi çərçivəsində “Milli Döyüş Təyyarələrinin İnkişafı üzrə Əməkdaşlığın İmzalanma Mərasimi” keçirilib. Müqavilə Azərbaycan Müdafiə Nazirliyi ilə TUSAŞ arasında imzalanıb.

T0 adlanan KAAN-ın ilkin şərtlərinin yerinə yetirildiyi tarix 2018-ci ildir.

2018-2022-ci illər arasında KAAN-ın ilkin layihələndirmə işləri aparılıb.

2022-2029-cu illərdə KAAN-ın əhatəli layihələndirmə və kvalifikasiya fəaliyyətləri həyata keçiriləcək. Bu çərçivədə KAAN 2023-cü ildə anqardan çıxarılıb. 2026-cı ilə qədər 3 prototipin istehsalı planlaşdırılır.

Hərbi Hava Qüvvələri Komandanlığına təhvil veriləcək “Blok-10” konfiqurasiyasının 2029-cu ilə qədər hazırlanması gözlənilir.

Növbəti mərhələdə istehsal olunacaq 10 ədəd “TF-X Blok-1” döyüş təyyarəsi 2030-2033-cü illər arasında Türkiyə Hərbi Hava Qüvvələrinə təhvil veriləcək. Amma Türkiyə Hərbi Hava Qüvvələrinin açıqladığı bu tarix TUSAŞ tərəfindən 2028-ci il olaraq yenidən nəzərdən keçirilib.

2034-2040-cı illər arasında digər TF-X bloklarının inkişafı və kütləvi istehsalı fəaliyyətləri həyata keçiriləcək. Bu tarix TUSAŞ tərəfindən 2030-cu il olaraq dəyişdirilib”.

Türkiyə müdafiə naziri Yaşar Gülər bundan əvvəl Pakistanın KAAN Milli Döyüş Təyyarəsi Proqramında iştirakı ilə bağlı müqavilənin imzalanmaq üzrə olduğunu açıqlayıb.

“Bizə F-35 vermədilər. Bu da bizi öz təyyarəmizi yaratmağa təşviq etdi. Bir növ bizə yaxşılıq etdilər, indi KAAN-ı hazırlayırıq. Dost və qardaş ölkələr də bu layihədə tərəfdaş olmaq üçün səy göstərirlər. Azərbaycanla müqavilə imzalanıb, Pakistanla imzalanmaq üzrədir, başqa ölkələr də var. Onlar da gələcək”, - nazir bildirib.