Ukrayna ordusu iki istiqamətdə irəliləyir - Rusların mövqeləri ələ keçirildi

Son sutka ərzində cəbhədə Rusiya və Ukrayna qüvvələri arasında 25-dən çox toqquşma qeydə alınıb.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rus ordusu Kupyan istiqamətində Xarkov vilayətinin Sınkivka kəndi yaxınlığında uğursuz hücum əməliyyatı keçirib. Baxmut istiqamətində isə Donetsk vilayətinin Kurdyumivka qəsəbəsi yaxınlığında irəliləməyə cəhd edib. Hücumların uğurlu alınmadığı bildirilir.

Ukrayna ordusu Marin istiqamətində rusların hücum cəhdlərinin qarşısını almağa davam edir.

Eyni zamanda, Ukrayna müdafiə qüvvələri Melitopol və Berdyan istiqamətlərində hücum əməliyyatları aparır, azad edilmiş mövqelərdə möhkəmlənir, kəşfiyyat işləri aparır.

Bundan başqa, ötən sutka ərzində Ukrayna aviasiyası Rusiya ordusunun şəxsi heyətinin cəmləşdiyi ərazilərə 9 zərbə endirib.

Baş Qərargahdan verilən məlumata görə, raket qoşunlarının və artilleriya bölmələri Rusiyanın atəş mövqelərinə, 1 idarəetmə məntəqəsinə və 3 artilleriya sisteminə zərbə endirib.

Eyni zamanda, ruslar Ukraynanın mövqelərinə və yaşayış ərazilərinə 29 hava və 43 raket zərbəsi endirib.