Döyüşlər səngimir - Rus ordusunun hücumları dəf edildi

Son sutka ərzində cəbhədə Ukrayna və Rusiya silahlı qüvvələri arasında 94 toqquşma baş verib.

Teleqraf.com xəbər verir ki, bu barədə Ukrayna ordusunun Baş Qərargahı məlumat yayıb.

Ukrayna qüvvələri bu müddətdə Xarkov vilayətinin Sinkivka və Petropavlivka rayonlarında - Kupyan istiqamətində Rusiyanın 3 hücumunu dəf edib.

Rusiya qoşunları Liman istiqamətində də hücumlarını gücləndirib. Luqansk vilayətinin Makivka, Beloqorivka və Donetsk vilayətinin Verxnokamyansk kəndləri yaxınlığında 14 hücumun qarşısı alınıb. Ruslar Donetsk vilayətinin Klişçivka və Andrivka qəsəbələri yaxınlığında (Baxmut istiqaməti) daha 5 uğursuz hücum əməliyyatı keçirib.

Rusiya ordusu Avdiv şəhərini mühasirəyə almaq cəhdlərindən əl çəkməyib. Ukrayna qoşunları son sutka ərzində bu istiqamətdə 11 hücumun qarşısını alıb. Marin şəhəri istiqamətində də 16 belə cəhd dayandırılıb.