Qadın fəallığını təşviq edirik - Baş nazirin müavini

Qadınların sahibkarlıq fəaliyyətinə dəstək verilməsi Azərbaycan hökuməti və Prezident İlham Əliyevin diqqətindədir.

Teleqraf.com xəbər verir ki, bu sözləri Baş nazirin müavini Əli Əhmədov Ailə, Qadın və Uşaq Problemləri üzrə Dövlət Komitəsinin Azərbaycanda Qadın Sahibkarlığının İnkişafı Assosiasiyası ilə birgə Qlobal sahibkarlıq həftəsi çərçivəsində bu gün keçirdiyi “Üfüqdə yeni fürsətlər: qadın sahibkarlara yaşıl işıq!” adlı konfransda deyib:

“Harada qadın fəallığı yüksəkdirsə, orada ictimai tərəqqinin yüksək pilləyə çatması barədə fikir söyləmək mümkündür. Azərbaycanda qadın ictimai həyatın bütün sahələrində iştirak edir. Bunun ən vacib tərkib hissələrindən biri də qadınların məşğulluğudur.

Təhsildə, səhiyyədə qadınlar iştirak payına görə kişilərdən yüksəkdə dayanır. Biz qadınlarımızın ictimai həyatın bütün sahələrində bərabər təmsil olunmalarını istəyirik və bunu təşviq edirik.

Azərbaycan hökuməti Əmək və Əhalinin Sosial Müdafiəsi Nazirliyi vasitəsilə özünəməşğulluq üçün maliyyə vəsaiti ayırmağı nəzərdə tutub.

Qadınlar nə qədər fəallaşacaqlarsa bütövlükdə Azərbaycanda əhalinin azadlıq dərəcəsi, həyatımızın inkişaf səviyyəsi yüksəlmiş olacaq. Sahibkarlıqla məşğul olan qadınlara fəaliyyətlərində uğurlar arzulayıram. Biz istəyirik, qadın-kişi bərabərliyi təkcə qanunda deyil, həyatın bütün sahələrində öz əksini tapsın”.

Qeyd edək ki, konfransda Baş nazirin müavini Əli Əhmədov, Ailə Qadın və Uşaq Məsələləri üzrə Dövlət Komitəsinin sədri Hicran Hüseynova, BMT-nin Azərbaycandakı rezident əlaqələndiricisi Qulam İsakzai, Azərbaycanda Qadın Sahibkarlığının İnkişafı Assosiasiyasının idarə heyətinin sədri Səkinə Babayeva, qadın sahibkarlar və media nümayəndələri iştirak edib.

Hicran Hüseynova bildirib ki, Azərbaycanda sahibkarlığa çox böyük dəstək var: “Ölkəmiz bu sahədə bir çox beynəlxalq konvensiyaya qoşulub. Bu konvensiyalar ölkəmiz üçün vacib məsələlər”.

Hicran Hüsyenova qeyd edib ki, əvvəllər Azərbaycanda qadın sahibkarlar 4 faiz təşkil edirdisə, indi bu rəqəm 30 faizə çatıb:

“Son 15 ildə Azərbaycanda 4060-dan çox qadın sahibkara 72.5 milyon manat kredit verilib. Bu o deməkdir ki, Azərbaycanda bu istiqamətdə böyük dəyişikliklər davam edir”.