ASAP “Heydər Əliyev İli”nə həsr olunmuş silsilə tədbirlər keçirdi

Mayın 10-da ümummilli lideri, müstəqil Azərbaycan dövlətinin qurucusu Heydər Əliyevin anadan olmasının 100-cü ildönümü ilə əlaqədar Azərbaycanlı Tələbələr və Məzunlar Platformasının (ASAP) təşkilatçılığı ilə ölkə daxilində və xaricdə “Heydər Əliyev İli”nə həsr olunmuş silsilə tədbirlər keçirilib.

Teleqraf.com xəbər verir ki, ümummilli lider Heydər Əliyev hər zaman xalqımızın xeyriyyəçilik ənənələrini yüksək qiymətləndirilib.

Bu gün hər bir vətəndaşımızın üzərinə bu ənənələri davam etdirmək vəzifəsi düşür. Məhz bu səbəbdən Gənclər və İdman Nazirliyi və Gənclər Fondu, ASAP və Məzun Birliklərini ilə birgə həyata keçiriləcək ulu öndər Heydər Əliyevin 100 illiyinə həsr olunmuş #ƏNƏNƏ layihəsinə start verilib. Layihə çərçivəsində ilk görüş mayın 10-da ASAP və Azərbaycan-Macarıstan Məzunları İctimai Birliyinin (AHAU) birgə təşkilatçılığı ilə “SOS Uşaq Kəndləri-Azərbaycan” Assosiasiyası İctimai Birliyinin iştirakı ilə keçirilib. Görüşün nəticəsi olaraq, Məzun Birlikləri ilə xeyriyyə istiqamətində illik plan hazırlanacaq, mövcud intellektual resurslar vasitəsilə sosial həssas qruplarla iş, yardım aksiyaları, məzunlar tərəfindən ehtiyacı olan gənclərə ödənişsiz karyera bələdçiliyi, dil kursları və digər xeyriyyə tədbirləri həyata keçiriləcəkdir.

Gənclər Fondunun dəstəyi, ASAP Macarıstan və AHAU-nun birgə təşkilatçılığı ilə Macarıstanın Budapeşt şəhərində ümummilli lider Heydər Əliyevin 100 illiyinə həsr olunmuş intellektual turnir təşkil olunub. 70-dən çox azərbaycanlı gəncin iştirak etdiyi turnirdə ulu öndər Heydər Əliyevin keçdiyi böyük, mənalı və şərəfli həyat yoluna və Azərbaycan tarixinə aid suallar səsləndirilib.

Polşanın paytaxtı Varşava şəhərində də Azərbaycan Gənclər Fondunun dəstəyi və ASAP Polşanın təşkilatçılığı ilə ümummilli liderimiz Heydər Əliyevin 100 illiyinə həsr olunmuş dəyirmi masa təşkil olunub.

İsrailin Arava şəhərində Azərbaycanın İsraildəki Səfirliyinin, Gənclər Fondunun dəstəyi, ASAP və Azərbaycan-İsrail Tələbə və Məzun Şəbəkəsi İctimai Birliyinin birgə təşkilatçılığı ilə ümummilli lider Heydər Əliyevin 100 illiyinə həsr edilmiş dəyirmi masa keçirilib. Görüşdə Beynəlxalq Azərbaycan - İsrail Assosiasiyasının üzvləri, İsrail Universitetlərindən professorlar və azərbaycanlı gənclər iştirak edib.

Beynəlxalq Azərbaycan - İsrail Assosiasiyasının və ASAP-ın birgə təşkilatçılığı ilə İsraildə keçirilən digər görüşdə isə ulu öndər Heydər Əliyevin həyat və fəaliyyəti, onun Azərbaycan tarixindəki rolu barədə danışılıb, müstəqil dövlətimizin banisi, Azərbaycan xalqının xilaskarı olan ümummilli lider Heydər Əliyevin uzaqgörən siyasətindən bəhs edilib, onun zəngin irsinin bütün nəsillər üçün örnək olduğu diqqətə çatdırılıb.

Çinin paytaxtı Pekin şəhərində isə Heydər Əliyevin 100 illiyinə həsr olunmuş görüş keçirilib və foto sərgi təşkil olunub. Ölkəmizin Çin Xalq Respublikasında olan Səfirliyinin, Azərbaycan Gənclər Fondunun dəstəyi, ASAP və “Azərbaycan-Çin Məzunları Assosiasiyası”nın birgə təşkilatçılığı ilə keçirilən dəyirmi masada Çin Xalq Respublikasında təhsil alan azərbaycanlı gənclər iştirak edib. Azərbaycanın Çindəki səfiri Əkrəm Zeynallı bildirib ki, müstəqil dövlətçilik salnaməmizdə silinməz izlər qoymuş, azərbaycanlı olması ilə ömür boyu fəxr etmiş, milli qürur və iftixar mənbəyimiz olan ulu öndər Heydər Əliyev bu gün bütün dünyada Azərbaycan dövlətinin xilaskarı kimi qəbul edilir. Azərbaycanın yüksəlişini, beynəlxalq arenada qazandığı yüksək nüfuzunu qiymətləndirərkən Heydər Əliyevin xalqımız və dövlətimiz qarşısındakı əvəzsiz xidmətləri göz önündə canlanır. Daha sonra fotosərgiyə baxış olub. Bu tədbir eyni zamanda ölkəmizin Çin səfirliyinin və ASAP-ın birgə fəaliyyəti ilə ASAP Çin nümayəndəliyinin formalaşmasına zəmin yaradıb.

Bundan başqa, ASAP tərəfindən ümummilli liderin 100 illiyinə həsr olunmuş video layihələrə start verilib. Video çarxların mövzusu dahi şəxsiyyət Heydər Əliyev ilə çalışmış şəxslərin, ümummilli liderin təşəbbüsü ilə xaricə təhsil üçün göndərilmiş tələbələrin xatirələrini və dövlət proqramı ilə xaricdə təhsil alan gənclərin fikirlərini əhatə edəcək.