"Hər şey Bakıda həll olunacaq..." - "Dinamo" Zaqrebin baş məşqçisi

"Biz uzun müddətdir bir yerdə çıxış edəm ciddi komanda ilə qarşılaşırıq. Maksimum konsentrasiya olmalıyıq".

Teleqraf.com xəbər verir ki, bu sözləri Zaqreb "Dinamo"sunun baş məşqçisi Sergey Yakiroviç Çempionlar Liqasının pley-off mərhələsinin sabah "Qarabağ"la keçiriləcək ilk oyunundan əvvəl mətbuat konfransında deyib

Xorvatiya klubunun çalışdırıcısı "Qarabağ"ın ötən mövsüm Avropa Liqasında "Bayer"lə möhtəşəm oyunlarını xatırladıb: "Ötən mövsüm "Bayer"i çətin duruma saldılar. Son oyunda səfərdə 7 qol vuraraq mesaj verdilər. Bu, bizim üçün böyük xəbərdarlıqdır. Bir neçə fərdi ustalığı yaxşı olan oyunçuya malikdirlər".

Yakiroviç qeyd edib ki, heyətlə bağlı ciddi problem yoxdur. "Kapitan Ademidən başqa hamı sağlamdır. Ademinin vəziyyətinin necə olduğunu bu gün məşqdən sonra görəcəyik".

S.Yakiroviç "Qarabağ"ın güclü tərəflərini də göstərib: "Qarabağ"ın hücum xəttində çox yaxşı oyunçuları var. Yarımmüdafiəçilər Abdullah Zubir və Yassin Benzia, hücumçu Juninyo ortada Julio Romao - bu dörd oyunçu ən böyük təhlükədir. Onların müdafiəsinin isə necə olduğunu görəcəyik".

Baş məşqçi vurğulayıb ki, sabah cütün taleyinin həll olunmasını istəsə də, hər şey Bakıdakı cavab matçında bəlli olacaq: "Mən istərdim ki, sabah hər şey həll olunsun, amma bilirəm ki, bu, hələ birinci hissədir. Çempionlar Liqasında zəif rəqib yoxdur, hamısı öz ölkələrinin çempionudur".

S.Yakiroviç məşqçilik karyerasında ən böyük oyunların onu qarşıda gözlədiyi haqda deyilənlərlə razılaşıb. "Əlbəttə, bunlar ən böyük oyunlardır, Çempionlar Liqasına vəsiqə qazansaq, əla olardı".

Qeyd edək ki, sabah keçiriləcək “Dinamo” - “Qarabağ” görüşü Bakı vatı ilə saat 23:00-da başlayacaq.