“Neftin qiyməti hələ sabitləşməyib” - Deputat

“ABŞ Prezidenti Co Baydenin enerji gündəliyi dünya bazarlarında nefti yenidən bahalaşdırıb. İki gün öncə Ağ Evin yeni vergi paketi ilə bağlı açıqlaması neftin dünya bazar qiymətlərini azaltmışdı. 9 maddəlik “Təmiz Enerji İnqilabı” adlandırılan bu planın icrası ABŞ-da neft hasilatının azalmasına gətirib çıxara bilər ki, bu da bazara təsirsiz ötüşməyəcək”.

Teleqraf.com xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov deyib.

O bildirib ki, neft bazarında volatillik hələ də səngiməyib: “Hələlik bazarda qiymətlərin stabilliyinə zəmin yaradacaq faktorlar tam formalaşmayıb. Vaksinasiyanın qlobal genişlənməsinə baxmayaraq hələ də pandemiyanın nə zaman sonlanacağı bəlli deyil.

Bu isə o deməkdir ki, hələlik strateji bazarlara pandemiya ən çox təsir göstərən faktor olaraq qalmaqdadır”.