17 İyul 2021 13:30
807
12 Punto 14 Punto 16 Punto 18 Punto

“Azərxalça” ASC qələbə mövzusunda hazırlanmış “Zəfər” kolleksiyası üçün ən yaxşı xalça müsabiqəsini elan edir.

Bu barədə Teleqraf.com-a “Azərxalça” ASC-dən məlumat verilib.

Azərbaycan Ordusunun sentyabrın 27-də işğalçılara qarşı başladığı əks-hücum əməliyyatı, 44 gün davam edən müharibə və əldə etdiyi möhtəşəm qələbələr haqqında bundan sonra kitablar yazılacaq, filmlər çəkiləcək. “Azərxalça” ASC isə ölkəmizin müharibədə əldə etdiyi möhtəşəm qələbəni özünün “Zəfər” kolleksiyası ilə qeyd edəcək. Kolleksiyanın hazırlanması isə gənclərə həvalə ediləcək.

Müsabiqənin şərti: Aşağıda qeyd olunmuş ünvana portfolio (15 foto) və “Zəfər” kolleksiyasına aid eskizlər (3 foto) göndərmək.

Mövzu: Üzərində “Zəfər” mövzusunda təsvir olan xalça və ya xalça məmulatı modelləşdirmək, hər hansı səhnənin təsviri, milli xalça detallarından qaynaqlanan abstraksiyalar və s.

Yaş həddi: 21-35

Son tarix: 10.08.2021

Müsabiqədə qeyd olunmuş yaş aralığına aid rəssamlar, dizaynerlər, xalçaçı rəssamlar və s. iştirak edə bilərlər. Seçilmiş 20 nəfər ən yaxşı müsabiqə iştirakçısının işlərini münsiflər heyəti müəyyən edəcək. Həmin gənclər bir ay ərzində “Azərxalça” ASC emalatxanalarında həm yerli, həm də xarici mütəxəssislər tərəfindən təlimə cəlb olunacaqlar.

Mükafat: Təlimlərdə ən yaxşı nəticə göstərmiş üç gənc müsabiqənin sonunda mükafatlandırılacaq. İlk yerin sahibi “Azərxalça” ASC-də rəsmi işə başlayacaq. Digər iki gənc isə müəssissə ilə daimi əməkdaşlıq edəcək.

Fotoları göndərmək üçün ünvan: creative@azerxalca.az

Təlim iştirakçılarının ən bəyənilən eskizləri “Zəfər” kolleksiyasının hazırlanmasında istifadə oluncaq.

“Azərxalça” ASC “Zəfər” kolleksiyasının bir parçası olmaq, qələbəyə həsr olunmuş əsərlərini paylaşmaq və ən əsası müəssisədə çalışmaq istəyən bütün gəncləri müsabiqədə iştirak etməyə dəvət edir!


Müəllif: Yeganə Oqtayqızı