Prezident yanında Qeyri-Hökumət Təşkilatlarına Dövlət Dəstəyi Şurasının üzvü, BMAM sədri Rufiz Qonaqovun Teleqraf.com-a verdiyi məlumata görə, forumun əsas məqsədi Azərbaycan torpaqlarının işğal edilməsi faktının regionda təhlükəsizliyə təhdid və böhran yaratmasının beynəlxalq qurumlara çatdırılmasıdır: “Əsas məqsədimiz beynəlxalq təşkilatların Ermənistana sərt mövqe nümayiş etdirməsinə nail olmaq, Ermənistanın, eləcə də, Dağlıq Qarabağdakı terrorçu qrupun işğalçılıq siyasətinə, qeyri-qanuni fəaliyyətinə qarşı təsirli addımların atılması və BMT Təhlükəsizlik Şurasının dörd məlum qətnaməsinin işləməsi üçün beynəlxalq ictimaiyyətin səfərbər olunmasıdır”.
R.Qonaqov daha sonra bildirib ki, beynəlxalq təşkilatların və səfirliklərin, o cümlədən yerli və xarici medianın iştirakı ilə keçiriləcək ictimai forumun ayrı-ayrı panellərində Dağlıq Qarabağ probleminin regional və qlobal təhlükəsizliyə təsiri öyrəniləcək. Müzakirələrdə yerli və beynəlxalq ekspertlər çıxış edəcəklər.
İctimai forumun QHT-lərə Dövlət Dəstəyi Şurasının dəstəyi ilə iyunun 22-də keçirilməsi nəzərdə tutulur.