“Rusiyanı işğalçı adlandırırlar, amma…” – Poroşenko çıxılmaz vəziyyətdə

Ukrayna-Rusiya münasibətlərində qəribə vəziyyət yaranıb. Kiyevdə söhbət etdiyim elə bir ekspert və deputat yoxdur ki, bəlli səbəblərdən Rusiyanı işğalçı adlandırmasın. Ancaq problem ondadır ki, Ukrayna işğalçı adlandırdığı dövlətlə iqtisadi münasibələri kəsə bilmir.

Teleqraf.com xəbər verir ki, bunu politoloq Elxan Şahinoğlu deyib.

Politoloq son dönəmlərdə Ukrayna daxilində Rusiyaya qarşı yaranmış yeni situasiyanın obyektiv səbəblərinin olduğunu bildirib:

“Rusiyada bir neçə milyon ukraynalı miqrant var və onların ötən il vətənlərinə göndərdikləri pulun miqdarı 2.4 milyard dollar civarındadır. Və ya başqa rəqəmə müraciət edək: bu ilin 6 ayında Ukrayna ilə Rusiya arasında ticarət həcmi 5 milyard dollardan çoxdur. Bu ötən ilin göstəricisindən 14 faiz yuxarıdır.

Ukrayna iqtisadiyyatında problemlər kifayət qədərdir. Ona görə də Rusiyanın ən kəskin şəkildə tənqid edən və “sağ ol, imperiya” deyən Ukrayna Prezidenti Pyotr Poroşenko belə qonşu ölkə ilə iqtisadi əməkdaşlıqdan qopa bilmir. Ancaq bu səbəblər yenə də “torpaqlarını işğal edən dövlətlə necə iqtisadi əməkdaşlıq etmək olar” sualının aktuallığını azaltmır.

Rusiya da elə buna ümidlidir ki, bir gün Ukrayna rəhbərliyinə elə şəxs gələcək ki, Krımın ilhaqını və Donbasın bir qisminin itirilməsini həzm edəcək”.