10 Avqust 2016 11:29
578
12 Punto 14 Punto 16 Punto 18 Punto

Bu gün Elmi-Tədqiqat Аğ Ciyər Xəstəlikləri İnstitutunun fəaliyyətinə dair “Dəyirmi masa” keçirilib.

Tədbirdə çıxış edən Elmi Tədqiqat Аğ Ciyər Xəstəlikləri İnstitutunun direktor müavini İradə Axundova bildirib ki, İnstitut 12 kliniki şöbəni əhatə edən 6 elmi bölmədən ibarətdir: “Bura pulmonologiya, ftizio-cərrahiyyə, ftiziatriya, torakal cərrahiyyə, laborator-diaqnostika, tibbi-elmi informatika kimi elmi bölmələr daxildir.

Klinik şöbələrə 2 Pulmonologiya şöbəsi, tоrакаl-cərrahiyyə şöbəsi, ağ ciyərdən kənar vərəm şöbəsi, reanimasiya və intensiv terapiya, ağ ciyər vərəm cərrahiyyə şöbəsi, 2 vərəm terapiyası şöbəsi, irinli аğ ciyər vərəm cərrahiyyə şöbəsi, uşaq vərəm şöbəsi, ambulator-dispanser şöbə və laborator şöbələr daxildir”.

Direktor müavini qeyd edib ki, son illərdə dünya üzrə vərəm epidemiyasının sabitləşməsi meyilləri müşahidə edilməkdədir: “Vərəm – əsasən hava-damcı yolu ilə ötürülən infeksion xəstəlikdir. Ümümdünya Səhiyyə Təşkilatının statistik məlumatına əsasən dünyada il ərzində 9.000.000-dan artıq insan bu xəstəliyə yoluxur və 1.800.000 insan bu xəstəlikdən vəfat edir. Bu səbəbdən vərəm problemi dünya səhiyyə sisteminin qlobal problemi olaraq cəmiyyətin sağlam inkişafına təhlükə yaradır.

Müalicə olunmayan bir yoluxucu vərəm xəstəsi 1 ildə 10-15 yeni xəstə yaradır. Xəstəliyin vaxtında düzgün müalicə olunmaması əlillik və ölümlə nəticələnir. 1993-cü ildə ÜST vərəm xəstəliyinin yayılmasının qarşısının alınması və epidemioloji vəziyyətin nəzarət altında saxlanılması məqsədilə dünyada gərgin epidemioloji vəziyyət elan etmiş bu xəstəliyə qarşı bütün ölkələrə birgə mübarizə aparmaq tövsiyə edilib. Ümumdünya Səhiyyə Təşkilatı dünya ictimaiyyəti qarşısında 2050-ci ilədək vərəmin yayılmasını qeyri əhəmiyyətli səviyyəyə çatdırılması vəzifəsini qoyur. Lakin buna nail olmaq üçün həm səhiyyə sistemləri, həm də bütün dünya ölkələrinin hökumətləri tərəfindən ciddi səylər tələb olunur”.

Vərəm xəstəliyi probleminin Azərbaycanda da aktual olduğunu deyən İradə Axundova deyir ki, son statistik məlumatlara əsasən son illərdə ölkədə xəstələnmə səviyyəsinin azalması, müalicə effektivliyinin yüksəlməsi, xəstə kontingentin əhəmiyyətli dərəcədə azalması tendensiyası müşahidə olunur: “Səhiyyə Nazirliyinin Milli Vərəm Proqramı çərçivəsində ETACXİ-nun nəzarəti altında respublikada epidemiloji vəziyyəti xarakterizə edən vərəm xəstəliyinə dair statistik göstəricilər toplanaraq analiz olunur. Belə ki, son 5 ildə xəstələnmənin dinamikasında müsbət dəyişikliklər (2010 ildə 100 000 əhaliyə 53,5-dən 2014 ildə 100 000 əhaliyə 41,3-yə dək azalma) müşahidə olunur. Bu da öz növbəsində vərəm üzrə işin yaxşı təşkilindən xəbər verir. Epidemioloji vəziyyəti xarakterizə edən əlavə gostəricilərdən biri də ilkin aşkar olunmuş vərəmli xəstələr arasında ayri-ayri kliniki formalar üzrə xəstələnmədir. Ağ ciyər vərəminin strukturuna nəzər salsaq, ümumilikdə ölkə üzrə ocaqlı (erkən) vərəm formalaranın artması, infiltrativ vərəm formalarının azalması, gecikmiş, yayılmış vərəm formalarının sayında isə stabilləşmə müşahidə olunur. Bu da öz növbəsində əhalinin, əsasən də risk qruplarının aktiv aşkarlanma üsullarına aktiv cəlb olunması, erkən aşkarlanmanın yaxşı aparılması ilə əlaqədardır. Epidemioloji prosesin gedişini təyin etmək üçün cari ildə ilkin xəstələr arasında 0-14 və 15-17 yaş qruplarında xəstələnən uşaqların payı hesablanılır. Son illər ərzində uşaqlar və yeniyetmələr arasında xəstələnmənin azalması (21,45-dən 14,3-dək ) müşahidə olunur. Bu birtərəfli tendensiya ölkədə ümumilikdə epidemioloji proseslərin stabilləşməsini göstərir”

İlhamə ƏBÜLFƏT


Müəllif: