Səhiyyədə ilk: Videobağlantı vasitəsilə yardım edilir

Ötən il ərzində Təcili və Təxirəsalınmaz Tibbi Yardım Stansiyasının nəzdindəki 12 regional məntəqə və konsultativ bölmədə 2590 nəfərə xidmət göstərib.

Səhiyyə Nazirliyindən Teleqraf.com-a verilən xəbərə görə, bu barədə Stansiyanın baş həkimi Mirələm Cəlalov deyib.

Məlumata görə, məntəqələrdə yol-nəqliyyat və digər fövqəladə hallarla bağlı 1022 hadisə zamanı 1736 pasiyentə tibbi yardım edilib, onlardan 70 faizi hospitalizasiya olunub.

Ötən il ilə müqayisədə hadisələrin sayında 7 faiz, xəsarət alanların sayında isə 3 faiz artım olsa da, letallıq 18 faiz azalıb.

Təcili Təxirəsalınmaz Tibbi Yardım Stansiyasına kritik vəziyyətdə olan 92 hamilə və zahıya dair 183 çağırış edilib. Onlardan 32-si Bakıya və digər rayonlara köçürülüb. 24 nəfərinə isə telesəhiyyə vasitəsilə məsləhət verilib.

2017-ci ildə ölkəmizdə ilk dəfə təcili və təxirəsalınmaz tibbi xidmətdə telesəhiyyə texnologiyalarının tətbiqi ilə məsafədən videobağlantı vasitəsilə konsultasiyalar həyata keçirilib.

Bu günədək 600-dən çox müraciət telesəhiyyə texnologiyaları vasitəsilə cavablandırılıb, xəstələrə məsafədən vaxtında məsləhətlər verilib.