Bu qidalardan zəhərlənmək istəmirsizsə... – Vacib qaydalar

Havalar soyuyanda ev şəraitində hazırlanan turşu və konservlərdən istifadə artır. Amma belə qidalar zəhərlənmələrə də səbəb olur. Bəs bunun qarşısını almaq üçün hansı tədbirləri görməliyik?

Teleqraf.com bununla bağlı Azərbaycan Qida Təhlükəsizliyi Agentliyinə sorğu göndərib.

Agentlikdən bildirilib ki, steril olmayan şəraitdə hazırlanmış hər bir konservləşdirilmiş qida məhsulu ayrı-ayrılıqda təhlükə mənbəyidir: “Evdə hazırlanan konservlərin bir sıra qaydalara əməl olunaraq konservləşdirilməsi və saxlanılması vacibdir.

Yaxşı sterilləşdirilməmiş konservalarda, xüsusilə, “clostridium botulinum” adlı bakteriya yaranır ki, bu bakteriya ciddi qida zəhərlənmələrinə gətirib çıxara bilir. Bakteriyanın yaranmasına səbəb isə yaxşı bişirilmədən bağlanan konservalardır. Keyfiyyətsiz konservlərin istehlakı insan sağlamlığı üçün ciddi təhlükə mənbəyidir.

Konservləşdirilmiş meyvə-tərəvəzi yaxşı yumaq əsas şərtdir. Çünki meyvə və tərəvəzin üzərində qalan torpaq (torpaqda olan gübrələr, pestisidlər) zəhərlənməyə səbəb ola bilir. Yaxşı olar ki, meyvə və tərəvəzlər isti su ilə yuyulsun”.

Agentlik ev şəraitində konserv hazırlayan zaman aşağıdakı qaydalara əməl olunmasını tövsiyə edir:

“İsti qidaları qabların içərisinə doldurun. Qabın içərisinə hava girməməsi üçün bandları qabın ətrafına doğru sıxın.

Bankaları nisbətən sərin, qaranlıq yerdə, təxminən 50° və 70° C arasında saxlayın.

Bir il ərzində istifadə edəcəyinizdən artıq hazırlamayın.

Metal qapaqlar 1 dəfə konservləşdirilmə üçün nəzərdə tutulduğunu unutmayın. Tərəvəzlərdən hazırlanmış konservləri isə quru, sərin və qaranlıq yerlərdə saxlamaq tövsiyə olunur.

Beləliklə, şüşə və metal qablarda qablaşdırılmış tərəvəz konservləri -0-25 °C-də, polimerlərdə qablaşdırılmış meyvə-tərəvəz konservləri -0-20°C-də, metal və şüşə bankalarda olan göbələk konservləri -0-15 °C-də, çəlləklərdə olan sterilləşdirilməmiş məhsulları -0-12°C-də, çəlləklərdə duza qoyulmuş tərəvəz və göbələkləri -1-4°C-də saxlayın”.