3 İyul 2020 17:17
243

Sərt karantin rejiminin ikinci həftəsi tamamlanır, yoluxanların sayı yüksək səviyyədə qalmaqdadır.

Teleqraf.com xəbər verir ki, bunu Azərbaycan Respublikası Prezidentinin iqtisadi məsələlər üzrə köməkçisi Şahmar Mövsümov Operativ Qərargahın bugünkü brifinqində deyib:

"Karantin rejiminin nə qədər sərt olması onun həyata keçirilməsindən asılıdır. Məhdudiyyətlərə nə qədər riayət edilməsə, yoluxma statistikası da artacaq. Bütün dünya ölkələri bu problemlə mübarizə aparır. Azərbaycanın da bu problemlə mübarizə aparması cəmiyyətin səfərbər olması deməkdir. Bu, ümumxalq problemidir".

Şahmar Mövsümov qeyd edib ki, hazırda mühraibədəyik və yalnız qaydalara riayət etməklə bu müharibədə qalib gələ bilərik: "Avtobus, metro, ticarət mərkəzlərində sıxlıq çox olur. Bu məkanlarda kimsə maskasız olur. Maska taxmayanlardan maskadan istifadə etmələrini xahiş edək.

Mənə tez-tez sual verilir ki, pandemiya nə zaman bitəcək. Hər birimiz bunun tez başa çatmasını istəyirik və buna görə də tələblərə riayət etməliyik. Əvvəllər nəyisə bilməyəndə dünya təcrübəsinə müraciət edirdiksə, hazırda bu təcrübə yoxdur. Dünya bu suala cavab axtarır".

Prezidentin köməkçisi bildirib ki, hazırkı vəziyyət onu çox narahat edir və hər birimiz risk altındayıq: "Bu riski yaradan sadə insanlardır. Bu gün yoluxma saylarında artım bütün dünya ölkələrində var. Hər birində ciddi karantin tədbirləri görülür. Digər ölkələrlə müqayisədə biz əvvəldən çox qətiyyətli addımlar atdıq və sonra yumşalmalara getdik".


Müəllif: Aysel Azad