Distant təhsil İqtisad İnstitutunda genişlənəcək

İnstitut Anadolu Universiteti ilə əməkdaşlığa başlayır

Dekabrın 16-daAnadolu Universitetinin rektoru, professor Naci Gündoğan Azərbaycan Dövlət İqtisad Universitetində (ADİU) olub.

ADİU-nun Marketinq və Kommunikasıya Departamentindən Teleqraf.com-a verilən xəbərə görə, ADİU-nun rektoru, professor Ədalət Muradovla görüşdə iki universitet arasında gələcək əməkdaşlıq məsələləri müzakirə olunub.

Görüş zamanı ali təhsil ocağında tədrisin keyfiyyətinin daha da artırılması, ADİU əməkdaşlarının Anadolu Universitetində elmi təcrübə keçməsi və araşdırmaların aparılması, eyni zamanda dərs proqramları, birgə distant təhsil və ortaq dərslik proqramlarının hazırlanması barədə qərara gəlinib.

Qeyd edək ki, 1958-ci ildə təsis edilən Anadolu Universiteti 17 fakültə üzrə kadrlar hazırlayır. İki milyon tələbəsi olan ali təhsil ocağı Türkiyənin ən böyük distant təhsil fakültəsinə malikdir.

SEVİL