Zəlzələdən sonra görülən işlər açıqlandı

“Bu gün səhər saatlarında əldə etdiyimiz məlumata görə, zəlzələdən sonra gecə saatlarında 34 nəfər təcili yardım xidmətinə müraciət edib”.

Teleqraf.com xəbər verir ki, bunu TƏBİB-in İcraçı direktoru Vüqar Qurbanov jurnalistlərə açıqlamasında bildirib.

Onun sözlərinə görə, təcili tibbi yardım xidməti dünən baş vermiş zəlzələ ilə əlaqədar ölkə üzrə gücləndirilmiş iş rejiminə keçirilib: “Həm regionlarda, həm Bakı şəhərində yerləşən tibb mərkəzləri tam hazırlıqlı vəziyyətə gətirilib ki, vətəndaşlarımızın tibbi xidmətlə bağlı müraciəti keyfiyyətli şəkildə icra edilsin”.

V.Qurbanov qeyd edib ki, vətəndaşların təcili tibbi yardım xidmətinə müraciətləri hər hansı xəsarətlə bağlı olmayıb: “Bu müraciətlər arterial təzyiqin yüksəlməsi, bununla bağlı şikayətlər olan hallar idi. Bu hallarla bağlı vətəndaşlara xidmət göstərilib. Hazırda tibbi xidmətin təşkili ilə bağlı çətinliyimiz yoxdur”.

Qeyd edək ki, yerli vaxtla iyulun 4-ü saat 00:01-də Xəzər dənizində zəlzələ qeydə alınıb. Zəlzələ Quba, Xaçmaz, Şabran, Siyəzən 6 bala yaxın, Sumqayıt, Abşeron yarımadası və ona yaxın ərazilərdə 5-4 bala qədər hiss olunub. Təkanların maqnitudası 5,5, dərinliyi isə 65 km olub. Dağıntı və tələfat olmayıb.