Məişət zorakılığı: "Problemin həlli yollarını bilirik, amma..." - Aynur Camalqızı

"Cəmiyyətimizdəki problemlərlə bağlı müzakirələrin ən önəmli tərəfi odur ki, səsləndirilən fikirlər, həll yollarını göstərən təkliflər kağız üzərində qalmasın".

Teleqraf.com xəbər verir ki, bu sözləri “Teleqraf” Media Qrupunun rəhbəri, əməkdar jurnalist Aynur Camalqızı "Litaris Holding" MMC-nin ulu öndər Heydər Əliyevin 100 illiyi çərçivəsində həyata keçirdiyi "Qadına şiddətə son" layihəsi çərçivəsində "Narkomaniya və məişət zorakılığına qarşı mübarizədə vətəndaş məsuliyyəti" adlı tədbirdə çıxışı zamanı bildirib:

"Narkomaniya və məişət zorakılığı ilə bağlı məsələlər müvafiq qanunvericiliyimizdə mükəmməl şəkildə əks olunub. Amma təəssüf ki, qanunların işləmə mexanizmləri qənaətbəxş deyil. Yəni əslində problemin həlli yollarını bilirik, amma onların həyata keçirilməsi üçün işləmə mexanizmləri, hüquqi vasitələr və tənzimləmələr bir çox hallarda səmərəsiz olur.

Vəziyyətdən çıxış yolları haqqında düşünməliyik. Təhsil məsələsinə çox ciddi önəm verilməlidir. Təhsilli, ağıllı, öz hüquqlarını bilən qadına heç bir halda heç bir kişi zorakılıq edə bilməz. Çünki təhsilli qadın güclü qadın deməkdir. Bu problemlər həm də ondan qaynaqlanır ki, təəssüflər olsun, Azərbaycanda bir çox hallarda qadınlar bilərəkdən zəif duruma salınırlar. Erkən yaşda təhsildən kənarlaşdırılırlar. Və bu müvafiq hüquq-müafizə orqanlarının gözü önündə baş verir, onlar sadəcə, prosesi seyr etməklə kifayətlənirlər.

Qızlarımızın orta təhsildən kənarlaşdırılması, - halbuki Azərbaycanda müvafiq qanunvericiliyə əsasən orta təhsil məcburidir, - yaxud onların erkən yaşda evləndirilməsi yolverilməzdir. Onu da qeyd edək ki, Azərbaycanda qadınların ailə qurması üçün yaş həddi 18 yaş nəzərdə tutulub.

Əgər bir kənddə, şəhərdə 14-15 yaşlı qız evləndirilirsə, biz yalnız ailəni, cəmiyyəti ittiham etməməliyik. Eyni zamanda o bölgədəki hüquq-mühafizə orqanları da çox böyük məsuliyyət daşıyırlar. Bu, təkcə vətəndaşlıq yanaşması deyil, həm də onların vəzifə borcudur. Bu sahəyə diqqəti artırmaq və problemə daha həssas yanaşmaq lazımdır. Maarifləndirmə işləri daha da gücləndirilməlidir.

Bu işdə televiziyalarımızın da üzərinə çox böyük yük düşür. Əminəm ki, sosial çarxların, maarifləndirmə proqramlarının daha da artırılmasına yerli telekanallar önəm verəcəklər. Məsələn, Real TV-də maarifləndirmə məsələsinə çox böyük üstünlük verilir".

Aynur Camalqızı həmçinin, Ermənistanda girovluqda saxlanılar azərbaycanlılar barədə də danışıb:

"İnsan Hüquqları üzrə Müvəkkilimuz (Ombudsman) Səbinə Əliyeva çox vacib bir məqamı vurğuladı. Birinci Qarabağ müharibəsində Ermənistanda saxlanılan əsir və girovlarımız bizim ən ağrılı problemimizdir. Rəsmi məlumata əsasən, 4000-ə yaxın azərbaycanlı hələ də Ermənistanda girovluqda saxlanılır və onların təxminən 300 nəfərə yaxını qadındır.

Azərbaycan dövləti bütün beynəlxalq təşkilatlarda bu məsələni davamlı olaraq qaldırır. Amma təəssüf ki, həmin soydaşlarımızın taleyi ilə bağlı, onların girovluqdan azad edilməsi istiqamətində heç nə edə bilmirik. Həmin soydaşlarımız düşmən ölkədə istismara məruz qalır, qul kimi işlədilirlər.

Birinci Qarabağ savaşı zamanı əsir və girov götürülənlərin 71 nəfəri uşaq olub. Söhbət 30 il əvvəldən gedir. Onlar əgər həyatdadırlarsa, artıq yetkin insanlardır. O insanların başına nələr gətirilib, indi biz onları necə xilas edə bilərik, bu barədə konkret addımlar atılmalıdır.

Azərbaycan artıq qalib dövlətdir. Ermənistanı o insanları girovluqdan azad etməyə məcbur və ya sövq etmək üçün beynəlxalq insan hüquqları təşkilatları ilə sıx işləməli, onların da bu prosesdə iştirakına nail olmağa səy göstərmək lazımdır.

Dəfələrlə sosial şəbəkələrdə Ermənistanda saxlanılan vətəndaşlarımızla bağlı videolar yayılıb. Mən özüm bir neçə dəfə o videoları ürək ağrısı ilə izləmişəm. Əminəm ki, onların çoxu həyatdadırlar, yaşayırlar. Onların azadlığa qovuşması üçün müvafiq dövlət qurumlarınən rəhbərliyi ilə çox işlər görə bilərik və görməliyik"