İKT sektorunda ABŞ-Azərbaycan əlaqələri müzakirə olunub

Rabitə və yüksək texnologiyalar naziri Əli Abbasov Amerika Birləşmiş Ştatlarının ölkəmizdə yeni təyin olunmuş səfiri Robert Sekuta ilə görüşüb.

Əli Abbasov ikitərəfli münasibətlərin uğurlu inkişafına İKT sektorunun da töhfə verə biləcəyini qeyd edərək, ölkəmizdə bu sahə üzrə həyata keçirilən islahatlar, regional təşəbbüslərdən söz açıb. Onun sözlərinə görə, Azərbaycanın koordinatorluq etdiyi “Trans-Avrasiya Super İnformasiya Magistralı” (TASİM) layihəsinə ciddi maraq göstərilir: “Ölkəmizdə müşahidə edilən internetin inkişaf meyilləri, gələcəkdə bu inkişafa təkan verəcək “Milli genişzolaqlı internetin inkişafı” layihəsi, eyni zamanda kosmik sənayenin inkişaf perspektivləri var”.

Azərbaycanda aparılan islahatlarla tanış olduğunu qeyd edən səfir Robert Sekuta isə iqtisadiyyatın gələcək inkişafının təmin edilməsində İKT sektorunun prioritet istiqamət kimi önə çəkilməsindən məmnunluğunu ifadə edib.

Peyk sənayesində Azərbaycan-ABŞ əməkdaşlığına da toxunan diplomat gələcəkdə azərbaycanlı mütəxəssislərin ABŞ-da müəyyən ixtisaslar üzrə kadr hazırlığının aparılmasında, eləcə də İKT sahəsində ABŞ təcrübəsinin Azərbaycanla mübadiləsində maraqlı olduqlarını vurğulayıb.

Görüşdə İKT sahəsində Azərbaycan-ABŞ münasibətlərinin inkişafı ilə bağlı digər məsələlər ətrafında da təkliflər səsləndirilib, perspektiv planlar ətrafında geniş fikir mübadiləsi aparılıb.