Azərbaycanda IV Moto Festival başlayır

Festivalda iştirak pulsuzdur

Azərbaycan daha bir festivala hazırlaşır. Teleqraf.com-un məlumatına görə, 28-30 avqust tarixlərində Şəkidə IV Beynəlxalq Qafqaz Motofestivalı keçiriləcək. Festival “Harley Davidson” “Baku HOG Azerbaijan”, Şəki İcra Hakimiyyəti, Mədəniyyət və Turizm Nazirliyi, Gənclər və İdman Nazirliyi və Çingiz Mustafayev Fondunun təşkilatçılığı ilə baş tutacaq.

Hər il olduğu kimi bu il də baykerlərin motosikletlərdə göstərdikləri əsrarəngiz şoular təqdim olunacaq. Şəkidə çıxış edəcək dünya şöhrətli “Lady Qaqa”, “Elvis Presli”, “Beatles”, “Kiss” qruplarının “tribute”ları isə festivala xüsusi rəng qatacaq. Unudulmaz gecə yerli müğənnilərin ifası, xarici DJ-lərin çoşduran musiqiləri ilə davam edəcək.

Qafqaz Moto festivalı çərçivəsində sərgi-yarmarka da təşkil olunacaq. Sərgi-yarmarkada motobrendlər, moto və digər aksessuarlar, həmçinin Azərbaycan mədəniyyətini əks etdirən əşyalar nümayiş olunacaq. Festival iştirakçılarına xüsusi turlar vasitəsilə gün ərzində şəhərin tarixi abidələrilə tanışlıq imkanı yaradılacaq.

Moto Festivala motobrendlər, motoklublar, moto mədəniyyət aləmi ilə maraqlananlar, ümumiyyətlə, maraqlı gün keçirmək istəyən hər kəs qatıla bilər. Bir sözlə, Motofest bol əyləncə, “test ride”, adrenalin və azadlıq ruhunu hiss etmək istəyən hər kəs üçündür. Festival Şəki Olimpiya Kompleksində təşkil olunacaq. Festivalda iştirak pulsuzdur.

Naibə QURBANOVA