Lənkəranskinin tərəfdarı hakimə: "Nədi, "srok"um bitir deyə..."

Quldur dəstəsi yaratmaqda təqsirləndirilən, kriminal aləmdə "Kritı Araz" kimi tanınan Araz Fərəcov və dəstə üzvləri Vüqar Musayev, Renad Zahirov, Namiq Babayev, Elməddin Şahbazov, Eltən Əliyev, Xəyyam Qurbanlının cinayət işi üzrə məhkəmə başlayıb.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilən prosesdə prokuror ittiham aktını elan edib.

İttihama görə, Araz Fərəcov Penitensiar Xidmətin 8 saylı müəssisəsində cəza çəkərkən, 2016-ci il dekabrın ayında əvvəldən tanıdığı Vüqar Musayev və digərləri ilə mütəşəkkil dəstə yaradıb .

Dəstə üzvləri Bakıda və bölgələrdə oğurluq və quldurluq hadisələri törədiblər. İttihamda qeyd edilib ki, bütün bunları Araz Fərəcov koordinasiya edib.

2017-ci aprelin 14-də Dövlət Təhlükəsizlik Xidmətinin əməliyyatı zamanı Vüqar Musayev, Renad Zahirov, Namiq Babayev saxlanılıb. Onlar mütəşəkkil dəstənin həbsdə olan Araz Fərəcov tərəfindən yaradıldığını bildiriblər. Araz Fərəcovdan başqa Elməddin Şahbazov da həbsxanada ola-ola cinayətkar dəstənin üzvü olub. O da işləri içəridən koordinasiya edib.

İttihama münasibət bildirən Araz Fərəcov özünü təqsirli bilməyib. O, deyib ki, bu işlə bağlı heç bir günahı yoxdur: "Mən həbsdə olanda DTX-ya apardılar. İki ay orda məni saxladılar. Sonra aparıb sanksiya verdilər. Mən bu adamların heç birini tanımamışam. Heç kimdən pul tələb eləməmişəm, pul almamışam. Dəstə-filan da yaratmatmışam".

Araz Fərəcovun sözlərinə görə, yatdığı kamerada telefon tapılıb: "Ədliyədə Nazirliyindən axtarış gəldi. Kameranı yoxladılar. İki telefon və akssesuarlar tapıldı. Mən heç kimdən pul tələb eləməmişəm. Kim mənim haqqımda nə danışıb, "duxu" varsa, gəlib üzümə desin. Nədi, indi "srok"um qurtarır deyə, gərək 15 il artırasınız? Mənim günahım yoxdur".

Vüqar Musayev bildirib ki, yazıb-oxumağı bilmir: "İstintaqda mənim adımdan çox şey yazıblar. Mən Arazdan-filandan tapşırıq almamışam. Oğurluqda olmuşan. Xaçmazda, Saatlıda, Binədə olan oğurluq hadisələrində iştirak eləmişəm. Binədən qızıl-zinət əşyaları götürdük".

Digər təqsirləndirilən Namiq Babayev bildirib ki, heç bir oğurluq hadisəsinində iştirak etməyib: "Mənim Vüqarla dostluğum olub. Birlikdə idmana getmişik. Sadəcə onları maşınımla aparmışam. Aparıb düşürmüşən. Özüm taksi sürücüsü olmuşam. Onların oğurluq elədiklərindən xəbərim olmayıb.

Birgə iş qurmaq niyyətimiz vardı. Vüqar da idmançıdır. Mən özüm firma rəhbəri olmuşam, əvvəllər dizayner işləmişəm. Son vaxtlar isə işlərimiz zəifləmişdi. Ona görə də sürücülük edirdim. Vüqargili öz maşınımla Binəyə aparmışam. Mənim onların nə işlə məşğul olduqlarından məlumatım olmayıb".

Təqsirlındirilən Eltən Əliyev ifadəsində göstərib ki, maşından tapılan silahın ona aidiyyəti yoxdur. Həmin silah dostuna məxsus olub:" Vüqar mənim dostumdur. Vüqarla birlikdə Binəyə getmişik. Oğurluğa aidiyyətim olmayıb. Polis maşını saxlayıb yük yerində lingi görəndə dedim ki, usta maşınıdır".

Prokurorun "sən "razborka" işlərinə baxırsan?" sualına Eltən Əliyev "xeyr, mən təsadüfən orada olmuşam, heç nədən xəbərim olmayıb" cavabını verib.

Xəyyam Qurbanlı ifadəsində zərərçəkmiş Zemfira Qədirovanın anasının qohumu olduğunu deyib:" Burda heç kimi tanımıram, bircə Vüqarı tanımışam. Bir dəfə gedib evin yerini göstərmişəm. Səhv hərəkət etmişəm. Zemfira anamın xalası qızı olub".

Zərərçəkmiş Zemfira Qədirova ifadəsində qohumundan şikayətçi olmadığını deyib :"Oğlum onkoloji xəstədir. Bu uşaqların hamısına Allah ruzi versin, onun-bunun qapısına göz dikməsinlər".

Məhkəmə prosesi martın 9-da davam edəcək.

Xatırladaq ki, Araz Fərəcov kriminal aləmdə "Kritı Araz"kimi tanınır. Onun mərhum "qanuni oğru" Rövşən Lənkəranskinin tərəfdarlarından olduğu qeyd edilib.