DİN ölümlə nəticələnən yol qəzaları ilə bağlı məlumat yaydı

İstirahət günləri respublikanın avtomobil yollarında baş verən qəzalarla bağlı məlumat yayıb.

Bu barədə Teleqraf.com-a Daxili İşlər Nazirliyinin mətbuat xidmətindən məlumat verilib.

Məlumata görə, 11 yol-nəqliyyat hadisəsi baş verib, nəticədə 7 nəfər ölüb, 14 nəfər yaralanıb.
Tovuz rayonunun Aşağı Quşçu kəndində ağır yol nəqliyyat hadisəsi baş verib. Müəyyən edilməmiş avtomobillə yolu keçən kənd sakini Niyaməddin Ayvazov vurulub. Piyada xəstəxanaya yerləşdirilib. Tovuz rayon Polis Şöbəsi tərəfindən əməliyyat-axtarış tədbirləri aparılır.

Daha bir yol qəzası Şabran şəhərində qeydə alınıb. Siyəzən rayon sakini Zahid Hüseynov idarə etdiyi “VAZ-21063” markalı avtomobillə yolu keçən Rusiya Federasiyası vətəndaşı Yuriy Sviridovu vurmuş və piyada hadisə yerində ölüb.

Zaqatala rayonunun Yuxarı Çardaxlar kəndində də ölümlə nəticələnən qəza baş verib. Kənd sakini Cahangir Əfəndiyev idarə etdiyi “QAZ-5204” markalı avtomobili dərəyə aşırıb. Onun sərnişini Ramazan Mustafayev xəstəxanaya aparılarkən ölüb.

Quba rayonunun Alekseyevka kəndində rayon sakinləri Vüsal Həbibovun idarə etdiyi “Volkswagen” markalı avtomobillə Rəşad Nəbiyevin idarə etdiyi “T-40” markalı traktor toqquşub. V.Həbibov və 2 sərnişini xəstəxanaya yerləşdirilmiş, onlardan Məmmədşərif Əsgərov ölüb.

Sumqayıt şəhərinin ərazisində şəhər sakini Nizami İsmayılov idarə etdiyi “Mercedes” markalı avtomobillə yolu keçən həmyerlisi Tofiq Bədəlovu vurmuş və piyada hadisə yerində ölüb.

Hacı Zeynalov