Biləcəridə zəncirvari yol qəzası baş verib

Bakının Binəqədi rayonunda zəncirvari yol qəzası baş verib.

Bu barədə Teleqraf.com-a Daxili İşlər Nazirliyinin mətbuat xidmətindən məlumat verilib.

Məlumata görə, hadisə rayonun Biləcəri qəsəbəsində qeydə alınıb. Bakı şəhər sakini Nazim Məmmədovun idarə etdiyi “ZİL” markalı avtokranı həmyerlisi Hafiz Hüseynova məxsus “Mercedes” markalı avtomobilə, habelə yolun kənarında dayanmış paytaxt sakinləri Yusif Şıxlarova məxsus “Toyota”, Asəf Şükürova məxsus “VAZ-2107” və David Əliyevə məxsus “Mercedes” markalı avtomobillərə vurub.

Sonradan H.Hüseynovun avtomobili yolun kənarında dayanmış Bakı şəhər sakini Oqtay Zərbəliyevə məxsus “Mercedes” markalı avtomobilə dəyib. N.Məmmədova, A.Şükürova və sərnişini Orxan Şərifova xəstəxanada ilkin tibbi yardım göstərilib.

Hacı Zeynalov