“Hyundai Badamdar”da 100 min manat mənimsəyən məhkəmə qarşısında

Bu gün Bakı Ağır Cinayətlər Məhkəməsində “Hyundai Badamdar” MMC-nin sabiq əməkdaşı Vüqar Musayevin cinayət işi üzrə məhkəmə prosesi başlayıb.

Teleqraf.com xəbər verir ki, Vüqar Musayevin qanunsuz hərəkətləri barədə cəmiyyətdən daxil olmuş material Baş prokuror yanında Korrupsiyaya qarşı Mübarizə Baş İdarəsində araşdırılıb.

Araşdırmalar zamanı Vüqar Musayev 10 aprel 2014-cü ildən 7 yanvar 2015-ci il tarixədək qeyd olunan şirkətin xəzinədarı vəzifəsində işləyərkən qulluq mövqeyindən istifadə etməklə satışdan əldə edilən pulları kassaya mədaxildən yayındırıb. O, cəmiyyətə məxsus 91 min 200 manat məbləğində pul vəsaitlərini mənimsəyib.

Vüqar Musayev Cinayət Məcəlləsinin 179.3.2-ci (qulluq mövqeyindən istifadə etməklə külli miqdarda mənimsəmə) maddəsi ilə ittiham edilib.

Hakim Ramella Allahverdiyevanın sədrliyi ilə keçirilən prosesdə prokuror ittiham aktını elan edib. Daha sonra ifadə verən Vüqar Musayev ittiham üzrə özünü təqsirli bilib.

Hacı Zeynalov