20 İyul 2016 12:36

Bakı şəhər Baş Polis İdarəsi və şəhər prokurorluğu Nərimanov rayonunda baş verən yol qəzasi ilə bağlı açıqlama yayıb.

Teleqraf.com xəbər verir ki, hadisə iyulun 19-da, saat 14 radələrində baş verib.

Bakı şəhər sakini Fərid Şahmarlı idarə etdiyi “Brilliance” markalı, 01-AB-055 dövlət nömrə nişanlı avtomobillə paytaxtın Nərimanov rayonu ərazisində hərəkətdə olarkən yol hərəkəti və nəqliyyat vasitələrinin istismarı qaydalarını kobud surətdə pozub. O, keçən piyadalar - Qiymət İbrahimova və Xədicə Kərimovanı vuraraq qaçıb.

Nəticədə Qiymət İbrahimova aldığı xəsarətlərdən hadisə yerində vəfat edib, Xədicə Kərimova isə müxtəlif dərəcəli bədən xəsarətləri alıb.

Faktla bağlı Nərimanov rayon Polis İdarəsinin İstintaq Şöbəsində Cinayət Məcəlləsinin 263.2 (yol hərəkəti və nəqliyyat vasitələrinin istismarı qaydalarını pozma) və 264-cü (yol nəqliyyat hadisəsi yerindən qaçma) maddələri ilə cinayət işi başlanıb.

Paytaxtın hüquq-mühafizə orqanları tərəfindən həyata keçirilmiş təxirəsalınmaz istintaq və əməliyyat-axtarış tədbirləri nəticəsində yol-nəqliyyat hadisəsini törədərək hadisə yerindən qaçmış sürücü tutularaq istintaqa cəlb edilib.

Hazırda iş üzrə istintaq tədbirləri davam etdirilir.

Hacı Zeynalov


Müəllif:
Загрузка...