19 Sentyabr 2016 22:25
859
12 Punto 14 Punto 16 Punto 18 Punto

Teleqraf.com Hədiyyə Şəfaqətin haykularını təqdim edir:

Gecənin səssiliyinə köçüb

Küləyin özgür vıyıltısı...
Budaqlar dirijor çubuğu kimidir

***

Ağ kəpənəklər

Qar yağanda doğulur
Üşüyür və baharacan gözləyirlər...

***

Şaxtanın əlləri

Pəncərədə donmuşdu
Bu üzdən dodaqlarını ona söykədi çiçək...

***

Qadın

Çoxdandır özünü görməmişdi
Durdu və bütün güzgülərin tozunu sildi...

***

Pişik

Su içmək istədi gecənin yarısı
Sahibəsini oyada bilmədi...

***

Yalnız bir misra yazılmışdı ağ vərəqdə:

"Mən gedirəm, hər şeyi unudaq"
P.S. "özümlə heç nə götürməmişəm"...

***

Ay işığı yoldan görünürdü-

Tənha qovağın
Yarpaqlarıyla oynayırdı.

***

Zamanı düşünmə-söylədi qoca-

Bəzən bir ildə
On gün sağ oluruq...

***

Səhər açılırdı, Günəş-

"Sabahın xeyir, gülümsə"- dedi Torpağa
Və yuxuya getdı...

***

Adamlar uzaqlara getsinlər deyə

Yol çəkdilər...
Qayıtmaq da olardı, əvəzində şeir yazdılar...

***

Qurumuşdu zirvədəki Ziyarət ağacı

Budaqlarında bozarmış parça qırıqlarının
Hamısının rəngi eyniydi...

***

Səsimizi musiqi kimi dinləyir Tanrı

Və unudur, bilir ki,
İnanırıqsa dua etmirik...


Müəllif: