Ulduzlar Bakıya gəlir - ADLAR

İyunun 17-dən 19-dək Bakının ev sahibliyi edəcəyi Formula-1 üzrə Avropa Qran Prisinin konsert proqramında iştirak edəcək dünya ulduzlarının adları bəlli olub.

Teleqraf.com xəbər verir ki, məşhur müğənnilər Kris Braun, Enrike İqlesias, Farrell Vilyams Formula-1 üçün dəvət olunub. Kris Braun iyunun 17-də, Enrike İqlesias iyunun 18-də, Farrell Vilyams isə iyunun 19-da Formula-1 şəhərciyində qurulmuş səhnədə çıxış edəcəklər.

Amerikalı müğənni, bəstəkar və rəqqas Kris Braun trekdə yarışın ilk günü sona çatdıqda minlərlə Formula 1 azarkeşinin qarşısında özünün “Yeah3x”, “Look At Me Now” və “Beautiful People” kimi məşhur hitlərini ifa edəcək.

“Latın Pop Musiqisinin Kralı” kimi tanınan ispan əsilli müğənni Enrike İqlesias səhnədə özünün “Hero”, “Bailamos” və “I Like It” kimi məşhur hitlərini səsləndirəcək.

016-cı il Formula 1 Avropa Qran Prisində sonuncu avtomobil finiş xəttini keçdikdən bir neçə saat sonra Vilyamsın mükəmməl ifası ilə Bakıda ilk dəfə keçirilən Formula 1 tədbiri başa çatacaq.
Konsertə giriş isə ödənişsizdir.

Bakı Şəhər Halqası Əməliyyat Şirkətinin Marketinq və Kommunikasiya şöbəsinin rəhbəri Nigar Arpadarai ulduzların Bakıya gəlişinə belə münasibət bildirib: “Dünya üzrə keçirilən müxtəlif Qran Pri yarışlarında musiqi ulduzlarının iştirakı onu sübut edir ki, musiqi ilə Formula 1-in vəhdəti ayrılmazdır.

Bugünkü xəbərə əsaslanaraq onu deyə bilərəm ki, Formula 1 həftəsonu ərzində avto-idman azarkeşləri və musiqisevərlər həm trekdə, həm də trekdən kənarda təşkil olunacaq və Bakının ev sahibliyi edəcəyi böyük idman yarışının və əyləncənin uğurlu vəhdətini izləyə biləcəklər. Bizə qoşulmaq barədə düşünənlərə sözümüz var: 2016-cı il Formula 1 Avropa Qran Prisini qaçırmaq olmaz. 17-19 iyun tarixlərində Bakıda sizinlə görüşməyi və birlikdə əylənməyi səbirsizliklə gözləyirik”.

Nərgiz