ABŞ İraqa F-16-lar və xüsusi təyinatlılar göndərdi

İraqın müdafiə nazirinin nümayəndəsi Təhsin İbrahim ölkəsinin ABŞ-dan 4 ədəd yeni F-16 qırıcı təyyarəsi aldığını bildirib.

Teleqraf.com “Associated Press”ə istinadən xəbər verir ki, yeni hərbi təyyarələr “İslam Dövləti” terror qruplaşmasına qarşı mübarizəni gücləndirəcək.

T.İbrahim qeyd edib ki, artıq İraqın sərəncamında olan F-16 qırıcı təyyarələrinin sayı 8-ə çatıb. Ümumilikdə isə, əldə olunmuş razılaşmaya görə ABŞ İraqa 36 ədəd F-16 göndərməlidir.

Qeyd edək ki, az öncə yayılan məlumata görə, ABŞ İraqa hərbçilərdən ibarət əlavə qrup – 400 xüsusi təyinatlı göndərəcək. Hərbçilər Fort-Kempbell hərbi bazasının ikinci döyüş briqadasından yola salınacaq. Bu ilin yazından bəri ABŞ artıq 1300 hərbçidən ibarət əlavə qüvvə göndərib.

Bir müddət öncə ABŞ prezidenti Barak Obama bəyan edib ki, Birləşmiş Ştatlar “İslam Dövləti” terror qruplaşmasının başçılarının ovunu davam etdirəcək. Bundan əlavə amerikan lider qeyd edib ki, “İslam dövləti” ərazilər itirir, amma idarə və hücumlara ruhlandırmaq imkanını əlində saxlayır.

Səxavət