Senatorlar vəlihədi qatil elan etdi – “Onun məlumatı olmadan...”

“Jurnalist Camal Qaşıqçının Səudiyyə Ərəbistanının vəliəhd şahzadəsi Məhəmməd bin Salmanın məlumatı olmadan qətlə yetirildiyinə inanmıram”.

Teleqraf.com xəbər verir ki, bu sözləri ABŞ-ın Karolina ştatının senatoru Lindsi Grem deyib.

O bildirib ki, əgər Səudiyyə Ərəbistanının siması və səsi Məhəmməd bin Salman olacaqsa, krallıq beynəlxalq aləmdə çox ağır dövrə qədəm qoyacaq:

“Səudiyyə önəmli müttəfiqdir. Ancaq vəliəhd şahzadəyə gəlincə, o, irrasional, çərçivəsiz biridir və ABŞ-Səudiyyə münasibətlərinə zərər verdiyini düşünürəm. Onunla əsla işləmək niyyətim yoxdur”.

Arizona ştatının demokrat senatoru Jeff Fleyk isə ABŞ Prezidenti Trampın Səudiyyə Ərəbistanının “əhəmiyyətli müttəfiq” olaraq qiymətləndirməsini tənqid edib:

“ABŞ Qaşıqçının öldürülməsi əmrini Məhəmməd bin Salmanın verdiyini qəbul etmək məcburiyyətində qalacaq”.

Kaliforniya ştatının demokrat təmsilçisi Adam Şifftin açıqlaması da senator Gremin fikirlərilə üst-üstə düşüb. O deyib ki, jurnalist və müxalifətçinin öldürülməsi vəliəhd şahzadənin informasiyası olmadan törədilən cinayət deyil.

“Düşmənimin düşməni dostumdur” prinsipini xatırladan senator bildirib ki, İran Amerikanın düşmənidir: “Səudiyyə Ərəbistanı İrana qarşı durmaq məsələsində bizim üçün önəmlidir. Amma bu, Səudiyyə Ərəbistanını bizə dost etməz. Dostlarımız jurnalist öldürməz”.