Nobel mükafatı almış alim öldü

DNT analizi üçün sadə və ucuz bir metodu kəşf etdiyi üçün kimya üzrə Nobel mükafatını almış amerikalı biokimyaçı Keri Müllis həyatının 75-ci ilində vəfat edib.

Teleqraf.com xəbər verir ki, alim Kaliforniya ştatının Nyu-Biç şəhərindəki evində ölüb.

Müllisin ölümünə səbəb pnevmoniyadan sonra yaranan ürək və tənəffüs çatışmazlığı olub.

Keri Müllis 1993-cü ildə Nobel mükafatına layiq görülüb. O, qeyri-adi dünyagörüşü və həyat tərzi ilə məşhur idi.

Nobelə layiq görülən dissertasiyasını müdafiə etdikdən sonra bir müddət elmdən ayrılmışdı.

Biokimyaçı 1998-ci ildə nəşr olunan “Ağıl sahəsindəki çılpaq rəqs” kitabında QİÇS və HİV arasındakı əlaqəni inkar etdi.