“İrəvan xahiş etdi, Ankara narazı olmadı, amma gələn dəfə...” - Politoloq

“Ermənistan hələ ki, Türkiyənin şətlərini qəbul etməyə hazır deyil. Ona görə də danışıqlar və müzakirələr hələ uzun müddət davam edəcək”.

Teleqraf.com xəbər verir ki, bunu politoloq Elxan Şahinoğlu deyib.

Ekspert Ermənistan-Türkiyə münasibətlərindəki son gəlişmələrə diqqət çəkib:

“Türkiyə və Ermənistan təmsilçilərinin Moskvadakı görüşü başa çatıb. Növbəti görüşün harada keçiriləcəyi bəlli deyil. İlk görüşün Moskvada keçirilməsini İrəvan Ankaradan xahiş etmişdi. Ankara buna etiraz etməyib. İrəvan ilk görüş yeri kimi Moskvanı seçməklə Rusiyanın istəyi xaricində addım atmayacağını Kremlə büruzə vermiş olub. Ankara isə Moskva variantına ona görə etiraz etməyib ki, həm İrəvana ilk görüşü pozmaq üçün bəhanə verməsin, həm də Kremli qıcıqlandırmasın. Ancaq növbəti görüş başqa məkanda keçirilməlidir.

Əgər tərəflər dialoqun genişlənməsində maraqlıdırlarsa, növbəti görüş məkanları növbə ilə İrəvan və Ankara seçilməlidir, yox əgər İrəvan dialoqun genişlənməsindən ehtiyat edirsə, Avropa şəhərlərindən birini seçməyə üstünlük verəcək”.

İlk görüşdə müzakirə olunan mövzuların mahiyyətinə gəldikdə, Elxan Şahinoğlu hesab edir ki, bunlar nəbz yoxlamasıdır:

“Ermənistan Türkiyə ilə sərhədin açılmasını, diplomatik münasibətlərin qurulmasını istəyirsə, Türkiyəyə qarşı ərazi iddiasından imtina etməli, Konstitusiyasına əl gəzdirməli və “erməni soyqırımı”nın tanınması vasitəsilə Türkiyəyə təzyiq siyasətindən vaz keçməlidir. Ermənistan hələ ki, Türkiyənin bu şətlərini qəbul etməyə hazır deyil. Ona görə də danışıqlar və müzakirələr hələ uzun müddət davam edəcək”.