Gizli dəstəkçisindən Kılıçdaroğluna mesaj: “Bizsiz qalib gələ bilməzsiniz”

Türkiyə müxalifətinin “Altılıq Masası” bloku CHP sədri Kamal Kılıçdaroğlunu prezidentliyə namizəd elan etdikdən sonra bütün gözlər PKK terror təşkilatının siyasi qanadı kimi tanınan HDP-yə çevrilib.

Teleqraf.com xəbər verir ki, HDP-nin keçmiş həmsədri Səlahəddin Dəmirtaş həbsxanadan Kılıçdaroğlu və İYİ partiya başqanı Maral Akşənərə “Bizsiz qalib gələ bilməzsiniz” mesajı göndərib.

Akşənərin CHP-nin HDP ilə partiya olaraq görüşə biləcəyini, amma tələblərinin masaya yatırılmasının mümkün olmayacağı sözlərinə HDP həmsədri Mithat Sancar cavab verib:

“CHP ilə yox, Millət İttifaqının namizədi cənab Kılıçdaroğlu ilə görüşəcəyik. İYİ Partiya dairələrinin dedikləri həqiqəti əks etdirmir. Heç belə davranışları qəbul etməməlidir”.

Kılıçdaroğlunun martın 14-də HDP-nin qərargahına gedəcəyi gözlənilir. Kulisdən gələn bilgilərə görə, HDP Kılıçdaroğluna şərti dəstək verəcək. Görüşdən əvvəl partiyada intensiv iş aparılır. İddiaya görə, görüşdə HDP rəhbərliyi Kılıçdaroğlunun qarşısına “muxtariyyət məsələsi”ni gətirəcək. HDP-nin bu və digər tələblərinə hansı cavabın veriləcəyi məlum olmasa da, bunun İYİ Partiya tərəfindən etirazla qarşılanacağı gözlənilir.

Kamal Kılıçdaroğlunun HDP ilə görüşəcəyi CHP-nin sözçüsü Faik Öztrak tərəfindən də təsdiqlənib. Bu, ölkədə birmənalı qarşılanmayıb.